کابل ټکی کام (یکشنبه، ۱۸ لیندۍ، ۱۴۰۳ل)
د بعث ګوند ۶۱ کلنه واکمني، چې په ۱۹۶۳م کال کي د یوې پوځي کودتا له لاري واک ته رسیدلی وو، د تحریرالشام په مشرۍ د اسلامپالو وسله والو لخوا د پلازمینې “دمشق” تر نیولو وروسته په رسمي توګه پای ته ورسېده.
بعث ګوند د ۱۹۶۳م کال په مارچ میاشت کې د یوې خونړۍ پوځ کودتا له لاري واک ته ورسید. ۱۹۷۰م کال کې حافظ الاسد، د سوریې د تښتیدلي واکمن بشار الاسد پلار، د ګوند دننه د کودتا له لاري واک ته ورسید او ۱۹۷۱م کال کې ولسمشر وټاکل شو. بشار الاسد د خپل پلار حافظ اسد له مړینې وروسته، واک ته ورسید او د بعث ګوند واکمنۍ ته یې دوام ورکړ.
د ویلو ده ،چې د بشار اسد واکمني هم د مخالفینو لخوا د حلب څخه د پيل شوي وسله وال پاڅون او د یو زیات شمیر ښارونو تر نیولو وروسته پلازمینې دمشق ته د ننوتو سره پایته ورسیده.
د اسد رژیم لومړي وزیر د ټولنیزې مډیا له لارې په خپور کړي یو پيغام کې وویل چې د اسد رژیم پایته رسیدلی دی او پر اسلامپالو ډلو يي غږ وکړ چې د هیواد عامه شتمنیو ته د زیان رسیدو پرته واک په لاس کې واخلي.
د ویلو ده چې دا معلومه نده چې بشار اسد چیرته تللی دی. تیره ورځ ځینو رسنیو اعلان وکړ، چې بشار اسد د ملاتړ د ترلاسه کولو په موخه ایران ته تللی دی؛ خو وروسته د اسد رژیم دا ادعا رد کړه.
له بل پلوه د تحریرالشام ځواکونو ویاند د سوریې د دولتي تلویزیون لخوا اعلان وکړ، چي دوی دمشق ازاد کړی او د بشار الاسد ۲۴ کلنه واکمني یی راپرزولي، او ویلي یې دي چي ټول زندانیان خوشي کړي دي.
اسلامپالو وسله والو، چې دا مهال د پلازمینې دمشق په ګډون په ادلب، حلب، حمص او ځینو نورو سیمو کنترول لري ویلي، چې ځواکونو یې د دوی په خبره د “مستبد” بشار الاسد ريژیم راپرزولی دی.
د ویلو ده، چې تیره شپه مخالفینو د دمشق پر لمنو برید وکړ او د رژیم ځواکونه له مهمو پوځي او ملکي ادارو لکه دفاع وزارت، کورنیو چارو وزارت او دمشق هوایي ډګر څه په شا شول.
