م. احمد طلحه
مدينې منورې ته د رسول الله صلی الله عليه وسلم تر هجرت وروسته، چې د يو اسلامي نظام بنسټونه کېښودل شول، د عثماني خلافت تر ړنګېدو پورې مسلمانانو له وياړونو او برياوو ډک تاريخ درلود، د هرې ورځې په تېرېدو سره به د اسلامي خلافت تر واک لاندې سيمې پراخېدې او کفرۍ نړۍ یې پر وړاندې د درېدا توان نه درلود او د نړۍ په هره برخه کې د مسلمانانو ځان، مال، ناموس او ارزښتونه خوندي وو.
خو له کومې ورځې چې د غرب په هڅو د عثماني خلافت بنسټونه ونړېدل او د اسلامي نړۍ پر سينه د بيلتون کرښې راوکښل شوې، د مسلمانانو د بدمرغۍ ورځې پيل شوې. له دې امله چې مسلمانانو يو قوي مرکزيت نه درلود، هر لورته پر مسلمانانو يرغلونه پيل شول او هيچرته يې هم ځان، مال او ناموس خوندي نه و.
په اسلامي تاريخ کې د بيت المقدس ارزښت له هيچا هم پټ نه دی، لومړۍ قبله د مسلمانانو لپاره د ناموس حيثيت لري، همدې ارزښت ته په کتو غربي نړۍ اسرائيل په منځني ختيځ کې د سرطان په څېر وپنځول او لسګونه کاله کيږي، چې اسلامي نړۍ او په ځانګړې توګه د فلسطين پر وړاندې يې ظلم او وحشت ته هڅوي.
له بده مرغه چې ځينې اسلامي هيوادونو هم د امريکا د دوستۍ په تمه په ټولو ارزښتونو پښه ايښې او اسرائيلو ته يې د دوستۍ لاس اوږد کړی، چې وروستی هيواد يې متحده عربي امارات دي، چې د ټرمپ په هڅو يې اسرائيلو سره د ډيپلوماتيکو اړيکو تړون لاسليک کړ او په دې توګه يې د ټولو مسلمانانو او په ځانګړې توګه د فلسطينيانو له سترې هيلې، د بيت المقدس ازادۍ، سره خيانت وکړ.
فلسطين او ترکيې د متحده عربي اماراتو دغه تصميم غندلی او دایې له بيت المقدس او نورو اسلامي ارزښتونو سره ستر خيانت ګڼلی دی. او ترکيې ګواښ کړی، چې ددې ګام پر وړاندې له دوبۍ سره د د يپلوماتيکو اړيکو په پرکون غور کوي. په عربي نړۍ کې دا درېيم هيواد شو، چې اسرائيلي ښکېلاکګرو سره دغه ډول بدمرغه تړون کوي، له دې وړاندې مصر په ۱۹۷۹ کې او وروسته اردن هم په ۱۹۹۴ کې ورته پرېکړه کړې وه.
