کابل ټکی کام (چهارشنبه، ۵ وږی، ۱۳۹۹ل)
د پاکستان لومړي وزیر عمران خان یو ځل بیا له افغان سولې خپل بشپړ ملاتړ اعلان کړی او زیاته کړې یې ده چې دی هیله لري بین الافغاني خبرې ژر تر ژره پیل شي.
نوموړي دا څرګندونې نن د ملي مصالحې د عالي شورا له رییس ډاکټر عبدالله عبدالله سره په ټلیفوني خبرو کې کړې دي.
له مصالحې شورا په همدې تړاو خپرې شوې خبرپاڼه کې راغلي، عمران خان دغه راز ویلي چې په افغانستان کې سوله او ثبات د پاکستان د سولې او ثبات په مانا ده او دوی ټول ورنه ملاتړ ګوي.
خبرپاڼه کاږي، عمران خان عبدالله ته پاکستان ته د رسمي سفر بلنه ورکړې ده چې عبدالله منلې او ویلي یې دي، د بین الافغاني خبرو تر پیل وروسته به په یو مناسب فرصت کې پاکستان ته سفر وکړي.
