څارګر احمدزی
د طالب بنديانو پروسه داسې ښکاري چې څو ورځې وړاندې يا بشپړه شوې او يا هم په بشپړېدو ده او د د ې پروسې له بشپړېدا وروسته ښودل شوې وه چې بايد بين الافغاني مذاکرات پيل شي، فضا هم بين الافغاني مذاکراتو ته برابره وه خو چون اوس د کابل ادارې او افغان سياسيونو ګډ پلاوی بيا د نامعلوم وخت لپاره ځنډول شوی. په داسې حال کې چې د پلاوي د ځنډېدو لامل هم څرګند نه دی.
د شنونکو پر باور د کابل ادارې او افغان سياسيونو پلاوي د ځنډ لوی لامل دا دی چې د طالب پلاوي پر وړاندې د کابل ادارې پلاوی داسې قوي منطق او استدلال نه لري. چې د خپل جمهوريت؟ او خپلې ډيموکراسۍ؟ دفاع پرې وکړای شي.
د طالبانو په مذاکراتي ټيم کې ټول د هېواد جيد علماء کرام، د پخواني او اوسني جهاد مهم مشران او د طالبانو مهم غړي او مشران دي چې په تېر ټول نولس کلن جهاد او د روسانو په خلاف يې جهاد کړی دی او ان نړيوال اسلامي شخصيتونه دي خو په وړاندې يې د کابل ادارې پلاوی بيا داسې حيثيت لري چې بې علمه او بې تعليمه دي او يا هم که کوم يو يې تعليمي سند لري نو هغه هم يا جعلي وي او يا هم له اسلامي علومو سره نا اشنا دی.
په بين الافغاني مذاکراتو کې به په تېرو نولس کلنو قربانيو رڼا اچول کیږي، د امريکا اشغال ته به تر ټولو سخت او وحشي اشغال ويل کيږي، چا چې نولس کاله په خپل ټول توان او طاقت سره د امریکا په خلاف جهاد کړی وي، هغه به د تاريخ اتلان ګرځي او چا چې د امریکا غلامي کړې وي، هغه به له تاریخ څخه لرې وي.
خو په وړاندې يې که چېرته د کابل ادارې تېر تاریخ راوسپړي نو بيا دوی ورته هيڅ ډول دليل اواستدلال نه لري. يوازې او يوازې دخپل تېر نولس کلن دور ځواب به نشي ويلی. دجمهوريت او ډيموکراسۍ دفاع خو په ځای پرېږده.
نو د دې لپاره چې د دغې ادارې پلاوی د طالبانو له ټیم سره مخا مخ نشي، اوس خپل سفرونه په مختلفو بهانو ځنډوي.
دغه شان کابل ادارې په تېرو وختونو د بنديانو پروسه هم له ځنډ او خند سره مخ کړې وه تر څو د سولې او مذاکراتو پروسه د امريکا تر انتخاباتو پورې وځنډوي او که چېرته د امریکا په انتخاباتو کې د افغانستان د جګړې د دوام کوم پلوی کامياب شي نو افغان او امریکايي جګړه به بيا پيل شي او د جګړې په بيا پيل کې څرګنده ده چې د کابل ادارې د چارواکو ګټې خوندي دي.
نو د دې لپاره دوی اوس هم دا هڅې کوي ترڅو بين الافغاني مذاکرات وځنډېږي او يا هم لږ تر لږه طالبان داسې حالت ته راشي چې د کابل ادارې چارواکو شخصي ګټې په بين الافغاني مذاکراتو کې مطرح او خوندي کړي، خو د کابل ادرارې د چارواکو دغه ډول توقعات بلکل غير معقول دي. او هسې يو خيال او خوب دی.
