کابل ټکی کام (چهارشنبه، ۲۴غویی، ۱۴۰۴ل)
د افغانستان د برېښنا شرکت عمومي اجرائيه رئیس ډاکټر عبدالباري عمر د کاسا-۱۰۰۰ پروژې د پرمختګ او همغږۍ په موخه د يو لوړپوړي پلاوي په مشرۍ تاجکستان ته سفر وکړ، څو د دې مهمې سیمهییزې پروژې په اړه په جوړه شوې ناسته کې ګډون وکړي.
د برېښنا شرکت د معلوماتو له مخې، په دې ناسته کې د افغانستان، تاجکستان، قرغزستان او پاکستان تر څنګ د اسلامي پراختیایي بانک او یو شمېر نورو نړیوالو ادارو استازي ګډون کوي.
یاده ناسته به د کاسا ۱۰۰۰ پروژې د روان وضعیت، تر سره شوو پرمختګونو، موجودو ستونزو او راتلونکو پلانونو پر ارزونه ترسره کېږي.
د افغانستان برېښنا شرکت ویلي، دوی ژمن دي چې د نړیوال بانک په مالي ملاتړ دغه ستره سیمهییزه پروژه ژر تر ژره بشپړه او د ګټې اخیستنې لپاره چمتو کړي، څو د کاسا غړو هېوادونو ترمنځ سیاسي او اقتصادي اړیکې لا پیاوړې شي.
کاسا ۱۰۰۰ پروژه، چې له افغانستانه تېرېږي، له منځنۍ آسیا څخه جنوبي آسیا ته د برېښنا د لېږد تر ټولو لویه سیمهییزه اقتصادي پروژه بلل کېږي.
