پلار ځوی ته په ورکړې زمکه کې د رجوع حق نه لري !

د فتوې شمېره (۳۳۲)

پوښتنه :

السلام علیکم ورحمة الله وبرکاته ! مفتي صیب محترمه ښه یې ؟ کراري ده ؟ یوه پوښتنه لرم که یې راته ځواب کړئ !

پلار څلور ګواهانو په مخکې د خپلو دوو ځامنو په مېنځ کې خپله زمکه تقسیم کړه ، هر یو ته یې حد وټاکه .

یو ځوی پخپله زمکه کور جوړ کړ خو هغه بل ځوی دغه زمکه خرڅول غواړي ، اوس پلار ورته وایي چې ما تاته دغه زمکه د خرڅ لپاره نه ده درکړې ، که کور پرې جوړولی شې سهي ده کنه ماته خپله زمکه راکړه .

اوس پوښتنه دا ده چې پلار دغه زمکه بېرته ګرځولی شي او کنه ؟ مننه

پوښتونکی : قاري اظهار الدین کوه صافي

الجواب وبالله التوفیق :

کله چې پلار خپل وارث ته یو شی ورکړي او پوره ملکیت یې ورکړي ، یا زمکه ورکړي او حدود یې ورته وټاکي ، د بیا رجوع حق نه لري .

له پوښتل شوي صورت څخه څرګندیږي چې پلار هر ځوی ته د زمکې حدود ټاکلي دي ، لهذا زمکه د زوی په ملکیت کې داخله ده او پلار د بیا ګرځولو حق نه لري .

الدلیل علی ذلک :

عَنِ ابْنِ عَبَّاسٍ رَضِيَ اللَّهُ عَنْهُمَا، قَالَ: قَالَ النَّبِيُّ صَلَّى اللهُ عَلَيْهِ وَسَلَّمَ: «لَيْسَ لَنَا مَثَلُ السَّوْءِ، الَّذِي يَعُودُ فِي هِبَتِهِ كَالكَلْبِ يَرْجِعُ فِي قَيْئِهِ»

صحيح البخاري , ټوک : ۱ ، مخ : ۳۵۱ ، کتاب الهبة , باب لايجوز لاحد ان یرجع فی هبته او صدقته

فلو وهب لذی محرم منه لا یرجع ….

الدرالمختار ، ټوک : ۵ ، مخ : ۷۰۵ ، کتاب الهبة ، باب الرجوع فی الهبة

(كتاب الْهِبَة)

هِيَ تمْلِيك عين بِلَا عوض وَتَصِح بِإِيجَاب وَقبُول، وتتم بِالْقَبْضِ الْكَامِل

ملتقي الابحر , ټوک : ۱ ، مخ : ۴۸۹ ، کتاب الهبة

والله تعالی اعلم بالصواب