(فتواشمیره: 68)
پوښتنه:
د کلي امام ته تنخوا ورکول جایز دي که نه ؟ څه خلک وایي چې په لمانځه ولې پیسې اخستل کیږي — مهربانی
(پوښتنه کونکی: محمدګل ـ افغانستان)
الجواب وبالله التوفیق
هرهغه عبادت چې دهغې په پریښودلو کې د دین دضایع کیدو خطره وي نو په هغې باندې پیسې اخستل روا دي لکه امامت ، اذان ، قران ښودل ، تدریس اوداسې نور ، او کوم عبادتونه چې داسې وي چې دهغې په پریښودلو سره ددین دضایع کیدو خطر نه وي نو په هغو باندې پیسې اخستل جایز نه دي ،
نو په امامت پیسې اخستل روا دي ، ځکه دامامت په پریښودو کې ددین دضیاع خطره ده ،او که پیسې اخستل ورته روا نشي نو بیا به څوک امامت نه کوي ، ځکه داهل عیال نفقه هم ضروري ده ، خپل ضروریات به څنګه پوره کوي؟ او پنځه وخته امامت سره کاروبار کول مشکل وي ، او بیا به امامت نااهله خلکو ته پاتې شي چې کوم ددین دډیر ضروري مسئلو نه هم خبره نه وي .
البته دپیسو اخستلو په صورت کې دامام لپاره نیت ددین دخدمت پکار دی ، نه داچې پيسې مقصود وګرځوي.
علامه حصکفي رحمه الله فرمایي :
(وَ) لَا لِأَجْلِ الطَّاعَاتِ مِثْلُ (الْأَذَانِ وَالْحَجِّ وَالْإِمَامَةِ وَتَعْلِيمِ الْقُرْآنِ وَالْفِقْهِ) وَيُفْتَى الْيَوْمُ بِصِحَّتِهَا لِتَعْلِيمِ الْقُرْآنِ وَالْفِقْهِ وَالْإِمَامَةِ وَالْأَذَانِ. وقال العلامة ابن عابدین: قَالَ فِي الْهِدَايَةِ: وَبَعْضُ مَشَايِخِنَا – رَحِمَهُمْ اللَّهُ تَعَالَى – اسْتَحْسَنُوا الِاسْتِئْجَارَ عَلَى تَعْلِيمِ الْقُرْآنِ الْيَوْمَ لِظُهُورِ التَّوَانِي فِي الْأُمُورِ الدِّينِيَّةِ، فَفِي الِامْتِنَاعِ تَضْيِيعُ حِفْظِ الْقُرْآنِ وَعَلَيْهِ الْفَتْوَى اهـ (شامي ټوک6 مخ 55 باب الاجارة الفاسدة. سعید)
