کابل ټکی کام (سه شنبه، ۴ سلواغه، ۱۴۰۱ل)
په داسې حال کې چې په دې وروستیو کې د پاکستان په امنیتي ځواکونو د مخالفو وسله والو ډلو په بریدونو زیاتوالی راغلی د یاد هېواد علماوو ” د تروریزم، افراطیت او نفرت” تر عنوان لاندې په یوې جوړې شوې غونډه کې ویلي، چې د هېواد پر ضد یې وسله وال مخالفت ښکاره بغاوت او د شریعت له مخې حرام دی.
دغه کنفرانس چې تیره ورځ د اسلام آباد په نړیوال اسلامي پوهنتون کې ترسره شو د پاکستان له لر او بر څخه پکې د بېلا بېلو مذهبي ډلو علماوو برخه اخیستې وه او د TTP یا پاکستاني طالبانو د کړنو په تړاو یې پکې یوه متفقه فتوی هم جارې کړې ده.
د علماوو په غونډه کې ویل شوي: پاکستان یو اسلامي دولت دی، د پاکستان اساسي قانون د پاکستان د اسلامي فطرت څرګندونه کوي.
د دوی په خبره د هیواد اساسي قانون یې یو داسې قانون دی، چې په بل هیڅ هیواد کې نشته. د پاکستان پر ضد هر ډول وسله وال اقدام ښکاره بغاوت او د شریعت له مخې ناروا او حرامه کړنه ده.
د دوی په خبره د پاکستاني طالبانو له مشر “مفتي نور ولي محسود” سره یې ۴۵ د قیقې خبرې کړې، دوی یې نه دي قانع کړي او د پاکستاني ریاست پر وړاندې د نوموړي فتوا بلکل غلطه ده.
دوی په تحریک طالبان پاکستان غږ کړی، چې باید پاکستاني ریاست د یو اسلامي دولت په توګه ومني او له وسله والو کړنو څخه لاس پر سر شي.
دوی په خپلو خبرو کې پر پاکستانې طالبانو سختې نیوکې کړي او هغوی یې په تیرو شلو کلونو کې د سلګونو علماوو، ماشومانو او ښځو په وژنه تورن کړي دي.
په یاده غونډه کې چې د اسلامي نړۍ په کچه پيژندل شوي پاکستاني دیني عالم او د جامعه کراچۍ د سترې دیني مدرسې مشر “مفتي محمد تقي عثماني” هم په انلاین بڼه پکې برخه اخیستي وه ویلي: دوی سره مفتي نور ولي محسود ژمنه کړې وه چې وسله وال به یې د ریاست پر وړاندې وسله نه پورته کوي خو هغوی خپله وعده ماته او یوځل بیا یې وسله وال فعالیتونه پیل کړل.
د یادو علماوو په خبره: مفتي نور ولي محسود او ملګري یې د ریاست پر وړاندې وسلوال مخالفت ته هیڅ توجیه نه لري دوی د نیوکې په بڼه ویلي چې پاکستاني طالبانو اوس د مذهب مسئله شاته غورځولې او د قبایلي سیمو د خپلواکۍ هڅې کوي څه شوه د دوی د مذهب هغه داعیه.؟
یادونه: کابل ټکی کام یوه خپلواکه خبري وېب پاڼه ده چې د افغانستان، سیمې او نړۍ په هکله تل تازه خبرونه تر خپلو هیوادوالو رسوي.
