د یو ورور په پیسو کې د نورو وروڼو حق نشته !

دفتوی شمیره (۱۹۷)

پوښتنه : السلام عليكم ورحمة اللة وبركاته

ملا صاحب زما پوشتنه داده چي زما پلار وفات دی تقريبا لس 10 كاله كيږي ، هغه وخت ما سره پيسې نه وې ، بيا مې وروڼو ته وويل چې هر سړی دې خپل ځان ته نفقه خپله حاصلوي ، په هغه سربېره زه جسماني كار ( د لاس مزدوري ) كوم ، د دوی سره مې كومك كاوه ، دوی په ما مشران دي او زما سره دپلار كوم ميراث هم ندی يعنې دپلار پيسې يا دارایی هم نشته راسره . اوس دوی وایي چې ستا سره پیسې دي مونږ ته به يې راكوې او دا پيسې ما جسماني كار باندې ګټلي دي د پلار د وفات نه وروسته ، ايا زه دا پيسې وركړم ؟

الجواب وبالله التوفیق :
کله چې پلار وفات شي نو هر سړی به ځان پخپله ساتي ، یو ورور په بل ورور هیڅ حق نه لري ، لهذا که رښتیا هم دغه پیسې تا پخپل مټ ګټلې وي ، دوی درسره په کاروبار کې شریکان نه وي یا دې په کاروبار کې د پلار مشترکه میراث نه وي لګولی نو دوی ستا په پیسو کې هیڅ حق نه لري او ټولې پیسې ستا حق کیږي .
او که دوی درسره په کاروبار کې شریکان وي یا دې د پلار مشترکه میراث په کاروبار کې لګولی وي نو بیا ددوی هم حق درسره کیږي .
الدلیل علی ذلک :
وما حصله احدهما فله وما حصلاه معا فلهما نصفین ان لم یعلم ما لکل وما حصله احدهما باعانة صاحبه فله ولصاحبه اجر مثله بالغا ما بلغ . الخ
الدرالختار ، ټوک ، ۳ ، مخ : ۳۶۰ ، فصل فی الشرکة الفاسدة
والله تعالی اعلم بالصواب