سرمقاله
افغانستان، چې کلونه یې د جګړو او اقتصادي بېثباتۍ له امله د پرمختګ له کاروانه وروسته پاتې شوی و، نن د یو نوي تحول پر درشل ولاړ دی. هغه تحول چې د ملي پانګې، طبیعي سرچینو او ښه مدیریت په ګډ اغېز رامنځته شوی دی. وروستۍ اقتصادي نښې څرګندوي چې هېواد د پرمختګ په لور روان دی او د دې تحول اصلي محورونه سترې زیربنايي پروژې، د تولیدي سکتور پراختیا او مالي ثبات دي.
د دې تحول په زړه کې د قوشتيپې ستر کانال ولاړ دی، هغه پروژه چې د دوهم فاز کار کې يې د پام وړ پرمختګ شوی. تمه کېږي چې د تکمیل وروسته به د زرګونو هکتارو د خړوبولو له لارې د افغانستان د زراعت یوه نوې دوره پیل شي. قوشتيپه یوازې یوه د اوبو پروژه نه ده، بلکې د اقتصادي خودکفایۍ او د خوړو د خونديتوب بنسټیزه طرحه ده.
په همدې څنګ کې، د زراعت او مالدارۍ سکتور کې د پام وړ ښه والی راغلی. ډېری سیمې چې پخوا کم حاصلې وې، اوس تولیدي فارمونو ته اوښتې دي او د کورنیو عاید لوړېدو سره، د سیمو اقتصادي ژوند بېرته راژوندی شوی دی. د کرنیزو محصولاتو د کیفیت او بازارموندنې بهتر مدیریت د دې برخې ارزښت لا لوړ کړی دی.
د تولیدي صنعت په برخه کې هم حرکت محسوس دی. نوې فابریکې پرانیستل شوې او لا هم پرانیستل کېږي. دا نه یوازې په هېواد کې د کار فرصتونه زیات کړي، بلکې د کورنیو تولیداتو لړۍ یې پیاوړې کړې او افغانستان یې له وارداتي اتکا ايستلی دی.
بله مهمه لاسته راوړنه د افغانۍ د ارزښت ثبات دی. په داسې نړیوال اقتصادي وضعیت کې چې ډېری هېوادونه د اسعارو د بېثباتۍ له ستونزو سره مخ دي، د افغانۍ نسبي ثبات د اقتصاد لپاره مهم پیغام لري: بازار ته اعتماد شته، او مالي مدیریت د کنټرول وړ دی.
دا ټول پرمختګونه تصادفي نه دي. د اقتصادي چارو متخصصین باور لري چې دا لاسته راوړنې د اسلامي امارت د منظم مدیریت، د اداري فساد د کچې راکمېدو، او د انضباط د زیاتېدو پایله ده. د پروژو پر لګښتونو نظارت، د عوایدو منظم کنټرول او د وارداتو پر ځای کورني تولید ته لومړیتوب هغه عوامل دي چې د اقتصاد تنفس یې اسانه کړی دی.
په هر حال، افغانستان لا هم د نړیوالو بندیزونو، د پانګې د جذب د محدودیت او د تخنیکي تجربې د کمښت له ستونزو سره مخ دی. خو تر ټولو مهم ټکی دا دی چې مهالژغورونکي ګامونه پورته شوي، او د پرمختګ لوری ټاکل شوی دی. اقتصاد د ثبات، دوام او مدیریت د کیفیت محصول دی او دا درې واړه نن په هېواد کې د پام وړ ښکاري.
