کابل ټکی کام (شنبه، ۶ مرغومي، ۱۴۰۴ل)
د ملګرو ملتونو پراختیايي پروګرام (UNDP) ویلي، چې د جاپان حکومت د افغانستان له زیانمنو خلکو د ملاتړ په موخه درې میلیونه امریکايي ډالر ځانګړي کړي دي.
د یادې ادارې د خبرپاڼې له مخې، دغه مالي مرسته به د هېواد د بشري وضعیت د ښهوالي او لومړنیو خدمتونو ته د خلکو د لاسرسي د پراخولو لپاره ولګول شي.
راپور کې راغلي، چې دا پروژه به په ځانګړي ډول د میندو، نوېزېږدو، ماشومانو او ځوانانو لپاره د روغتیايي خدمتونو د پیاوړتیا سبب شي، څو د یادو قشرونو روغتیايي اړتیاوې په ښه ډول پوره شي، په ځانګړي ډول په هغو سیمو کې چې روغتیايي اسانتیاوې محدودې دي.
د UNDP په وینا، د دې مرستې یوه برخه به د هغو کورنیو او وګړو د روحي ـ ټولنیز ملاتړ لپاره هم ولګول شي چې د طبیعي پېښو له امله زیانمن شوي دي. ویل شوي، چې دا مرستې به تر ډېره د هېواد لرې پرتو او محرومو سیمو ته متمرکزې وي، څو هلته د خلکو د ژوند پر ښهوالي اغېز ولري.
