کابل ټکی کام (چهارشنبه، ۱۹ وری، ۱۴۰۵ل)
د ننګرهار ولایت د رسنیو دفتر وايي، په دغه ولایت کې هوايي ځواک د سېلابونو پر مهال په بېلابېلو ولسوالیو کې بند پاتې ۱۵۸ تنه ژغورلي دي.
سرچينه زياتوي، په ګوشتې کې ۹۶، بهسودو کې ۵، لعلپورې کې ۳۶، مومندرې کې ۱۶، بټي کوټ کې ۸ او درونټې کې ۳ تنه ژغورل شوي، چې ټول په ۱۸ پروازونو کې خوندي ځایونو ته رسېدلي دي.
د دغه ولایت د بیړنیو حالاتو د ریاست د معلوماتو پر اساس، په تېرو دوو ورځو کې په دې ولایت کې ۲۴ تنه شهیدان او ۳۳ نور ټپیان شوي دي.
مسوولين زیاتوي چې د سختو بارانونو له امله رامنځته شوي ناورین ته په غبرګون کې د ژغورنې عملیاتو لړۍ روانه ده او لسګونه نور کسان چې له سېلابونو او اړوندو خطرونو سره مخامخ وو، هم خوندي شوي دي.
