(کابل ټکی کام ۱۳۹۷ مرغومی ۱۶)
راپورونه وایي چې افغان او امریکایي ځواکونو د تیر په څیر یوځل بیا د هیواد په دریو ولایاتو کې پر ولسي هیوادوالو شپنۍ چاپې وهلې، چې په ترڅ کې یې ګڼو افغانانو ته ځاني او مالي زیانونه اوښتي دي.
خبر زیاتوي، تیره شپه دکنړمنورې ولسوالۍ اړوند د “برولو، چنار، بچي“ او ځینو نورو کلیو باندې امریکایي او افغان ځواکونو شپنۍ چاپه وهلې چې په ترڅ کې یې یو تن مسافر چې تازه خپل کور ته راستون شوی و، په شهادت رسولی دی.
ګډوځواکونودغه راز یوکور په ټولیز ډول ویجاړ او د یوې میرمنې او یوه سپین ږیري په ګډون یې ۵ کلیوال ټپيان کړي دي.
په یوه بل خبر کې ویل شوي چې تیره شپه د غزني ولایت ده یک ولسوالۍ“ بالای“ په نامه سیمه کې امریکایي او افغان عسکرو د عامو خلکو پر کورونو چاپه وهلې او دوه (۲) تنه کلیوال وګړي یې په ډیر مظلومیت سره شهیدان کړي دي.
ګډوځواکونو پر دې بسنه نه ده کړې او په سیمه کې یې۳ کورونه په بشپړ ډول ویجاړ ، یو تراکتور اوګڼ شمیر سولر “د لمریزې بریښنا هندارې“یې هم له منځه وړي دي.
په همهاله توګه افغان – امریکایي ځواکونو د فاریاب ولایت د المار ولسوالۍ په قره غویلي او جلګلدي سیموکې بمبار کړی چې له امله یې ۵ تنه ولسي افغانانو ژوند له لاسه ورکړی دی.
طالبانو ټولې پیښې بشر ضد جنایات بللي او غندلي یې دي، خو افغان او امریکایي چارواکو د تیر په څیر یې په تړاو کوم سپیناوی نه دی کړی.
