غورځنګ
دا چې د هره ژبه او د هغې ژبې اديبان ادبي ښکلاوې او ادبي صنعتونه لري او اديبان بيا د هماغې ژبې د ادبي ښکلاوو پواسطه نومړې ژبه بډايه کوي او په دې واسطه سره خپله مورنۍ ژبه د نورو ژبو سياله ګرځوي نو زمونږ د هېواد نوميالي ولسمشر هم د هدې اصولو پر اساس ځينې لفظي ښکلاوې او لفظي صنعتونه له خپلې خولې څخه د مرغلرو په څېر ورولي دي چې مونږ به يې دلته په دې ليکنه کې بېلګې راوړو
ولسمشر غني چې ځان د افغانستان قانوني جمهور رئيس نوموي او ځان ته خطاب کوي چې ګواکې زه د افغانستان منتخب جمهور رئيس يم، خو له کومه وخته چې نوموړی د واک پر ګدۍ کېناستلی دی نو له هغه وخته په خپلو ويناوو کې ځينې لفظي ښکلاوې کاروي، چې د هغو له جملې څخه به دلته ځينې درته راوړو:
د واک ته رسېدلو په لومړي کال ولسمشر يوې غونډې ته د وينا پر مهال ويل: امام حسن وحسين نواسه های خداوند است (نعوذ بالله من ذالک)
دويم ځل يې بيا يوې غونډې ته په خپله وينا کې وويل چې زه هره ورځ د ورځې د باران لپاره د تهجد لمونځ کووم.
د پورتنۍ وينا پر مهال ولسمشر غني افغان ولس ته ځان تقوادار او پرهېزګار معرفي کاوه خو خبره ورڅخه لفظي ښکلاوو ته ووتله.
همدارنګه ولسمشر غني د خپلې واکمنۍ په راورسته وخت کې يو ځل په کندهار کې يوې غونډې ته د وينا پر مهال داسې هم وويل چې له ترکمنستان سره مې تړون کړی دی او له باد يا هوا څخه درته څو زره مېګاواټه برق توليدووم.
د ولسمشر غني تر ټولو جالبې لفظي ويناييزې ښکلاوې دا دي چې پر افغان ولس باندې يې چې له کومه وخته ټولې تجارتي لارې وتړلې نو ولس ته يې پر نوو لفظي ښکلاوو خوله خلاصه کړه او ويل يې: چې زه به د هېواد د اقتصادي سيستم د سمون لپاره هوايي دهلېزونه خلاص کړم او د هېواد زڼ غوزی به په نورو هېوادونو کې ډېر ارزښت پيدا کړي د هېواد کچالو به تر ټولو زيات ارزښتمند توليدوونکی توکی وګرځووم او په نړيوالو تجارتي او سوداګريزو بازارانو کې به ډېر زيات اهميت پيدا کړي.
دغه رنګ کله نا کله په يوه نيمه غونډه کې ولسمشر د خپل ځان ستاينه هم کوي چې د هغو له جملې څخه يې يوه ورځ وويل چې (له احمدشاه بابا نه راوخله تر ولسمشر کرزي پورې په واک يې څه ونه کړل؟ ورور ورور وواژه مګر يوازېنی ولسمشر زه يم چې د ولس په رائيه ولسمشر مقرر شوی يم، نه د امريکايانو په ټانکونو باندې سپور راغلی يم او نه هم د زور له لارې راغلی يم)
هېواد ته د سولې د راتللو په تړاو هم ولسمشر په مختلفو وختونو کې ويناوې کړي دي چې تر ټولو مهمه يې دا ده چې د سولې په باره کې يې د قرآن کريم (الفاظ د سولو خيرون) په ډول تلفظ کړل چې له دې سره نړيوالو ته هم پته ولګېده چې افغان ولسشمر؟؟! خو ديني پوهه هم ښه په پوره او پرېمانه اندازه لري.
خو تر ټولو مهم يې هغه متل دی چې تېرې لويې مشروتي؟؟! جرګې ته يې کړی دی او ويل چې ( که زه وايم چې زه يې، او ته وايې چې ته يې، نه به زه يم نه به ته يې، که زه وايم چې ته يې او ته وايې چې زه يم، هم زه يې هم به ته يم)
له پورتنيو لفظي ښکلاوو شيندلو څخه داسې معلومه شوه چې ولسمشر غني په ادبياتو او د پښتو ژبې له هر اړخ سره هم پوره بلدتيا لري او کله کله ناکله داسې نادر لفظي صنايع کاروي.
