کابل ټکى کام (پنجشنبه ، ٢ لړم ،١٣٩٨ل)
د ترکي انځورګر عثمان حمدي بک لوحه “د قران زدکړه” په لندن کې په شاوخوا ۶۴۰ ،۴ میلیونه پونډه (۹۲،۵ میلیونه ډالره) په یوه لیلام کې پلورل شوې ده.
نوموړي انځورګر د (۱۸۴۲-۱۹۱۰) کلونو ترمنځ ژوند کاوه او یو نامتو رسام و.
په دې لیلام کې د ګڼو نورو اروپايي او اسیايی نقاشانو تابلوګانې هم د پلور لپاره وړاندې شوې وې، خو د دغه ترکي رسم اېستونکي تابلو تر ټولو په لوړه بیه پلور شوې ده. دې سره حمدي بک په دې برخه کې له خپل فرانسوي استاد “جان لیون جیروم” څخه وړاندې شوی.
په دې ليلام کې ښاغلي “جیروم” هم د خپلو انځورونو ټولګه پلور ته وړاندې کړې وه، خو یوه تابلو یې “اسونه له صحرا تیریږي” په څه باندې درې میلیون پونډه پلورل شوې ده.
بله تابلو “د یافا بازار” چې د جرمني انځورګر “ګوسټاف باورنفیند” ابتکار او مصنوع وه، هم په لوړه بیه (3.7 پونډه) وپلورل شوه.
دغه هنري اثرونه نه یوازې په اروپايي یا نورو غربي هېوادونو کې مينوال لري، بلکې په خپله منځني ختیځ کې هم ځانګړي مینه وال او بازار لري.
چې تر ډېره دغه اثرونه د متحده عربي اماراتو او قطر موزیمونو کې نندارې ته وړاندې کیږي.
د دې تابلوګانو پېر او پلور دا ښيي چې په دې وروستيو کې د ختیځوالو هنر ته پام ور اوښتی دی، اروپا کې د نولسمې پېړۍ د هنرونو د بنسټ مشر “کلوډ بېننګ” وايي: د دې ډول هنري اثارو ۷۵% پیرونکي کسان یا بنسټونه د اسلامي هېوادونو سره تړاو لري.
