سخت او نازک حالات رښتيني او صادق دوستان معلوموي، د اشغال په کرغېړنه او توره دوره کې د کابل ټکی کام ویب پاڼې ملګرو کلونه، کلونه د ګران هېواد د آزادۍ او د یو خپلواک اسلامي نظام د راتلو لپاره شپه او ورځ پر ځان یوه کړې وه، اوس هم د اسلامي نظام د استحکام لپاره خدمت ته ژمن دي او د ګوتو په شمېر همکاران يې په نشت حساب امکاناتو اولس ته د حقائقو د رسولو په برخه کې هڅې کوي.
د ياد ويب سایټ ادارې هیله لرله چې د اشغال تر خاتمې او د اسلامي نظام تر راتګ وروسته به زموږ د همکارانو خدمتونه ښه تقدیر شي، د ویب پاڼې تېرو خدمتونو ته په کتلو به ورته د خدمت او نشراتو ښه زمینه برابره شي، خو متأسفانه چې داسې ونه شول. موږ که څه هم تر نن ورځې خپل خدمت ته ژمن یو خو که دا کیسه همداسې روانه وي او چارواکي، چې اوس یې هر څه تر وس پوره دي، توجه ورته ونه کړي، لرې نه ده چې د سایټ نشرات او خدمتونه اغیزمن او یا په ټولیزه توګه ودریږي.
که “اسلامي امارت” غواړي چې د نظام او اولس ترمنځ يووالی لا ډېر ټينګ کړي او فاصلې له منځه يوسي، د دښمنانو دسیسې او پلانونه شنډې کړي او اولس ته خپل غږ د فکري او متعهدو ځوانانو له لارې ورسوي، نو د سختو ورځو فرهنګي یاران دې نه هېروي. توجه دی ورته وکړي او ستونزو ته دې رسیدګي وکړي.
که څه هم اوس د مبارزې رنګ او ډول بدل شوی، خو پای ته نه ده رسیدلې، بلکې لا پیچلې شوې. لوديځه نړۍ او پخواني لوټماران هڅه کوي د اوسني حکومت او ملت تر منځ واټن ايجاد کړي او د همدې هدف لپاره شپه ورځ هلې ځلې کوي، په ځانګړې توګه د رسنيو له لارې، خو له بده مرغه په مطبوعاتي برخه کې زموږ فعاليت تر پخوا کمزوری شوی.
اوس چې امکانات ډېر شوي او د رسنيو له لارې موږ خپل غږ تر اولس پورې په ښه توګه رسولی شو، پکار ده، چې د نورو هڅو سربېره پخواني ویب سایټونه بیا فعال کړل شي، همکارانو ته يې لازمې اسانتياوې او امکانات برابر کړی شي، تر څو نوی نسل د ازادۍ او حریت په ارزښت و پوهول شي او د غربيانو د فکري جګړې را لوتی توپان مهار کړل شي.
د اشغالګرو په ضد د پاک او سپیڅلي جهاد او مقاومت پر مهال د کابل ټکی کام ویب پاڼې خدمتونه، وياړونه او فعاليت له هیچا څخه پټ نه دی. هيله مو ده، چې د اسلامي امارت چارواکي ژمنو، متعهدو او فکري ملګرو ته د خدمت فرصتونه برابر کړي.
