کابل ټکی کام (دوشنبه، ۶ وری، ۱۴۰۳)
د حماس اسلامي غورځنګ د سیاسي دفتر غړي او ویاند “حسام بدران” کابل ټکی کام وېب پاڼې سره په یوې ځانګړې مرکه ویلي، چې زموږ لومړيتوب د تېري پای ته رسېدل دي.
د حماس غورځنګ ویاند د کابل ټکی کام د پوښتنې په ځواب کې وویل: زموږ دریځ څرګند دی او هغه د صهیونیستي تېریو مخنیوی، د مرستو رسول، د بې ځایه شویو بیرته غزې ته را ستنیدل او د غزې تړانګې په ګډون له ټولو اشغال شویو فلسطیني ښارونو څخه د اشغالګرو اسرائیلي ځواکونو وتل او د فلسطین قضیې ته د یو دایمي حل لارې لټول دي.
نوموړي د خپلو خبرو پر دوام ویلي، چې د صهیونیست ريژيم د لومړي وزیر “نتنیاهو” مغرورانه چلند خبرو اترو کې د پر مختګ تر ټولو ستر خنډ دی.
حسام بدران نتنیاهو تورن کړی، چې د خپلو سیاسي او امنیتي ناکامیو د پټولو لپاره د اسرائیلي بندیانو کورنیو ته دوکه ورکوي.
د ویلو ده، چې د حماس اسلامي غورځنګ د سیاسي دفتر غړي او ویاند “حسام بدران” د کابل ټکی کام خبریال سره په خبرو کې یوځل بیا ټینګار کړی، چې د فلسطین تر بشپړې آزادۍ به خپلې پوځي او سیاسي مبارزې ته دوام ورکوي.
