د نړۍ مشهوره افغانه نجلۍ د جعل کارۍ په تور نیول شوې
(کابل ټکی کام ۱۳۹۵ لړم ۵) زرغون خوږیاڼی
د افغانستان تابعیت لرونکې او د نړۍ له مشهورو او عجیبه سترګو لرونکې نجلۍ د پاکستاني پولیسو لخوا د جعل کارۍ په تور نیول شوې ده.
دغه نجلۍ شربت ګله نومیږي چې د پاکستان د فدرالي څیړنو ادارې(ایف آی ای) لخوا د جعلي شناختي کارډ یا پيژند پاڼې د جوړولو په تور نیول شوې ده.
د پاکستان خبري رسنیو د فدرالي څیړونو د ادارې د معلوماتو له مخې ویلي دي، چې میرمن شربت ګله په اصل کې د افغانستان اوسیدونکې ده، چې د پاکستان پیژند پاڼه یا شناختي کارډ د یو تن پولیس په ضمانت چې اوسمهال په ګمرک کې د کمشنر په توګه دنده لري ورکړ شوی دی، چې یاد کمشنر هم د پولیسو لخوا نیول شوی دی.
د ترلاسه شوو معلوماتو له مخې ویل شوي، چې د شربت ګلې ۴۶ کلن میړه رحمت ګل د احصایې او نفوسو دثبت ادارې ځینو کارکوونکو ته د رشوت په ورکولو سره د شربت ګلې سربیره خپلو دوو زامنو، روف خان او ولي خان ته هم د پاکستان پیژند پاڼې اخیستې دي.
شربت ګله د خپلو پرکیفي سترګو په لرلو سره وروسته له هغه د نړۍ توجه د ځان په لوري واړوله او په مشهورو څیرو واوښته، چې په ۱۹۸۴ز کال کې نامتو عکاس او جغرافیه پوه سټيف مکري ترې د ناصر باغ په کیمپ کې انځور واخیست.
ویل کیږي، چې په دې وخت کې د شربت ګلې عمر ۱۲کاله و، وروسته یاد عکاس شربت ګلې پسې کلونه کلونه وګرځید خو نه یی شوه موندلی، چې په ۲۰۰۲ ز کال کې د ننګرهار په خوږیاڼو ولسوالۍ کې وموندله او یوه مرکه یې ورسره وکړه او نوموړې بي بي یې حج ته ولیږله.
ددې نجلۍ انځور د نشنل جیوګرافیک په تلویزیون او مجله کې د افغانستان د مشهورې او عجیبه څیرې ((افغانه نجلۍ)) په نوم نشر او ثبت شو.
نوموړې میرمنې په ۱۹۹۰ ز کال په پای کې له رحمت ګل سره، په پېښور کې واده کړی.
