عزیر اسدخېل
- سیکولرانو ښځینه سټیجونو ته د سندرو ویلو لپاره راویستې دي حال دا چې خدای تعالی ښځینه آن له اذان کولو او اقامت ویلو د دې لپاره منع کړې دي چي آوازونه یې نرم او زړه راښکونکي دي.
- سیکولرانو ښځینه پر سټیج باندې د تمثیلیانو او ډرامو لپاره راویستلي دي حال دا چې الله تعالی له ښځو د جَمعې او جُمعي لمونځونه ساقط کړي، یعنی پرې لازمی یې ندي ګرځولي خو که پخپله خوښه ورځي ورتللی شي.
- سیکولرانو ښځینه په تلیفوني کمپنیو کې مشتریانو ته په ځواب ویلو ګمارلي او په تلویزیونونو کې یې له ښکلا څخه په استفادې سره د سوداګریزو توکو لپاره د اعلاناتو وسیله ګرځولی دي، او هم یې د اړیکو په کمپنیانو کې د ښځینه و د اوازونو د نرم والی نه په استفادې سره د خپلو ګټو وسیلې ګرځولې دي څو د مشتریانو پام پیر او پلور ته د دوی د بدن او اواز د ښکلا په واسطه ورواړوي، حال دا چې الله تعالی ښځو ته د جمعي لمونځ کولو په وخت د امام د سهوي پر مهال د فتحي لپاره د آواز کولو لکه (سبحانه الله او داسی نور) پر ځای د لاسونو د پړقولو امر کړی دی.
- سیکولرانو ښځینه د اولمپیک او نورو لوبو کې د ګډون لپاره راویستلې دي حال دا چې الله تعالی له ښځو د صفا او مروة تر مینځ او د شیطانانو د ویشتلو او خپل کور (کعبې) د طواف کولو پر مهال منډې وهل ساقطې کړې دی، څو د ښځو حیا او عزت خوندي وساتل شي.
- سیکولرانو ښځه له محرم پرته سیاحت او چکرو ته ویستلې ده، حال دا چې الله تعالی د محرم په نه شتون کي ورڅخه د حج فریضه ادا کول ساقط ګرځولي دي.
- سیکولرانو ښځه د عطرو د استعمال، د ښایست له ښکاره کولو، نیمه بربنډه له کوره سرکونو ته راوویسته حال دا چې الله تعالی پر ښځینه پر پښو باندې د پایزیب له استعمال منع کړی څو د خلکو توجه جلب نکړي.
نو درنو خویندو!
- سیکولرانو تاسې ته وهم در اچولی چې ګوندې پورته ذکر شوي د الله تعالی د احکامو ضد اعمال او نیمه بربنډه جامه یو فرهنګ دی حال دا چې الله تعالی تاته د خپل بدن د پټ ساتلو امر کړی.
خویندو!
له درانه خوب او غفلته راویښې شئ، مخکې له دې چې هغه ورځ راورسیږي چې ستاسی بدن په کفنونو باندی پټ کړای شي.
