(کابل ټکی کام، ۱۳۹۷، مرغومی ۱۷)
طالبانو د ملي يووالي حکومت د دفاع وزارت هغه ادعا تش پروپاګند بللی چې ګواکې په عملیاتو کې يې د طالبانو ډيری قومندانان له منځه وړي او هغوی يې په جګړو کې کمزوري کړي دي.
د دفاع وزارت وياند غفور احمد جاويد نن ازادي راډيو ته ويلي، پر طالبانو يې تهاجمي عمليات کړي، د هغوی مهم قوماندانان يې له منځه وړي او جنګي ماشین يې ورته کمزوری کړی.
خو د طالبانو وياند ذبيح الله مجاهد د دفاع وزارت په غبرګون کې د يوې اعلاميې په ترڅ کې د دغه وزارت ادعا رد کړې او دا يې یوازې پروپاګند بللی زياتوي: دا د کابل ادارې د امنیتي چارواکو عادت دی چې همیشه خپل تلفات، خپله ناکامي او شرمندګۍ په رسنیزو غورځو پرځو پټوي او په دې وسیله له خپل ضعف څخه عامه توجه په بل لوری اړول غواړي.
اعلاميه کې راغلي، دفاع وزارت هيڅ کومه بېلګه نه ده وړاندې کړې چې په کومه ولسوالۍ، يا ولايت کې يې حالات په خپله ګټه څرخولي په خبره ” اوس هم په ټول هیواد کې د اسلامي امارت د زړورو مجاهدینو لخوا د مزدور دښمن په پوستو، مراکزو او قرارګاوو مرګوني بریدونه دوام لري چې دښمن هره شپه خپل لسګونه مړي او ټپيان ټولوي”.
په اعلاميه کې راغلي، دا چې ژمی او یخني طبيعي حالت دی نو ښايي په ځينو سيمو کې طالبانو خپل عمليات محدود کړي وي خو په دې معنا نه چې دفاع وزارت يې خپله لاسته راوړنه وبولي.
دا په داسې حال کې ده، چې پخوا به د ژمي په راتلو په هېواد کې جګړه يو څه اندازه کمه شوه خو سږ کال طالبانو په ژمي کې هم د دولتي ځواکونو په قرارګاوو او پوځي مرکزونو خپلو بريدونه ته زور ورکړی چې د ولسي جرګې په ننۍ غونډه کې هم د طالبانو له خوا ډېريدونکو بريدونه اندېښنه څرګنده شوې وايي چې طالبانو پرمختلليو وسلو ته لاس رسی پيدا کړی او له کبله يې د امنيتي ځواکونو په تلفاتو کې زياتوالی راغلی دی.
