(کابل ټکی کام ۱۳۹۷ مرغومی ۱۶)
هغه اثر چې ورته ټولنې زیاته اړتیا درلوده او د خلکو هیلې ورته ډیرې وې، بالاخره له چاپه راووت.
دغه کتاب چې د حقانیې دارالعلوم د سیاسي چارو چارو استاد مولنا عبدالباقي لیکلی، مهمو نکاتو او رموزو ته یې د کتنې سربیره ډیر هغه اسرار هم راسپړلي چې نوي ځوانان ورته زیاته اړتیا لري.
دا کتاب په ټوله کې پنځه بابونه بشپړوي، چې لومړی یې په نبوي سيرت کې د اسلامي نظام د حاکمولو د مراحلو يادونه ده
دوهم باب کې یې د اسلامي نظام د واکمنۍ څخه وروسته مراحل راسپړل شوي.
دريم باب کې بیا د بهرنیو استخباراتو په هکله تفصيلي خبرې شوې .
په دوام یې څلورم باب کې کورني استخبارات څیړل شوي او د ولسونو له حالاتو ځان خبرولو ته په کې اشاره شوې.
په پنځم باب کې بیا هم کورنيو استخباراتو باندې تمرکز شوی، خو د څارنې او مراقبت اړخ ته یې پاملرنه شوې ده.
کتاب ټولټال ۳۴۲ صفحې ده او د بورته بابونو لاندې ۴۳۹ مضامین په کې څیړل شوي دي.
د کتاب لیکونکی وایي، په استخباراتو کې خدمات له شرعي لحاظ سره څه ممانعت نه لري او نه هغه نقصانات په کې شته چې بعضې خلک يې ګمان کوي .
البته دا ضرور ده چې د اسلامي شريعت په رڼا کې دا خدمت ترسره شي ، که چيرته دا خدمت د اسلامي شريعت په حدودو کې انجام نه شي نو لازمي خبره ده هغه نقصانات بلکې د هغې نه هم لا زيات به مخې ته راځي کوم نقصانات چې ځينې خلک يې مطلقا استخباراتو ته متوجه کوي .
نوموړی وایي، اسلامي شريعت د هر مشروع کار د کولو طريقې هم مونږ ته بيان کړي دي دلته به زمونږ لپاره دا ضرور وي چې په اسلام کې د استخباراتو شرعي طريقه معلومه کړو .
