جواد یاسر
پر افغانستان د صلیبي یرغل سره جوخت هر بهرني او کورني داړمار او ځانچاري د خپلو شخصي ګټو او خېټې ډکو لپاره دلته خپل د ګټو آسونه پیاده کړل، هرچا تر خپله وسه د افغان ملت په غوښو او وینو ځانونه تغذیه او چاغ کړل/کوي. خو د آسونو د ځغاستې میدان او د یرغل په دوام یې د انسان وژنې ډګر یوازي د افغانستان جغرافیه وه/ده.
امریکا او ورسره نور غربیان غواړي چې دلته د یرغل په توګه حضور ولري او له دې ځایه د روسیې، ایران، پاکستان او په لویه کې د اسیا د ټولو هیوادونو سره سیالي وکړي او تر خپل اثر لاندې یې راولي. بل هدف یې په افغانستان کې د اسلامي شریعت مخه نیول دي.
روسیه چې د روان اشغال په لومړیو کې یې امریکا د افغانستان ښکېلتیا ته وهڅوله غواړي چې د زورورې او سیالې امریکا زور په جنګي افغانستان کې اوبه کړي او دلته یې مصروفه وساتي ترڅو روسان خپله ټکنالوجي، پوځ او اقتصاد قوي کړي چې د امریکا د احتمالي خطر څخه ځان بچ کړي.
ایران تر ۲۰۱۴م پورې د روان اشغال ښه سیوری لیده او د افغانستان د اوبو په مفت ډول جذب، د شعیه لږکیو ځواکمنول او سونیان پرې وهل او د شعیګانو په مټ دلته د استخباراتو ټولول د ایران مهم اهداف وه، خو د ۲۰۱۴م وروسته چې کله په جلال اباد کې د داعش د ظهور اوازې خپرې شوې د ایران پالیسي لږ بدله شوه، اوس د ایران لپاره په افغانستان کې تر ټولو مهم ارمان او هدف د داعش ځپل دي چې د هرچا په لاس وي، او د شعیه او سوني تر منځ نفرتونه یې اوس دلته متوقف کړې دي.
پاکستان چې امریکایي یرغلګرو ته یې د یرغل لپاره اډې ورکړې او د افغانستان جاسوسي پر غاړه ورته واخیسته په یرغل کې یې خپلې شخصي کټې لیدلې/ویني، تر ټولو مهمه مسأله د ډیورنډ د کرښې همدا سې ګونګ او بې پوښتنې پاتي کېدل دي چې د جګړې په جریان کې یې افغانان پوښتنه نه کوي، نور ډېر اهداف لکه استخبارات، پر افغانستان د خپلو توکو د پلور ګرم بازار او … هم لري.
همداسې تاجکستان، ترکمنستان، قزاقستان، چین، او د منځنۍ اسیا نور هیوادونه دلته د استخباراتي موخو ترڅنګ نور پټ او ښکاره اهداف لري چې د اشغال په سیورې کې یې لټولای شي، دلته هر هیواد د ځان لپاره جاسوسان پیاده کړې دي او پیسې ورکوي.
د افغانستان د اوسني حکومت چارواکي نیوي فیصد ۹۰% د پردویو مزدوران او کار او کردار یې د پردویو لپاره دی، دلته که کورونه ورانیږي، که مېرمنې کونډیږي، که ماشومان یتیمان کیږي، که ځوانان وژل کیږي او که افغانستان په کنډواله بدلیږي د چا یې پرې څه! د حکومت چارواکې د همدې وجاړي په بدل کې د خارجیانو څخه ښې پیسې اخلي، په خارجي هیوادونو کې یې د ځانو لپاره ځمکې، کوټۍ او بنګلې اخیستې دي او چې کله خارجیان د افغانستان څخه ځي دوی به هم ورسره ځي، افغانستان پوه شه او کار یې.
خو یوه خبره چې تل مو زړونو ته اطمنان، فکرونو ته فرحت او فیزکي وجود ته ځواک او تازګي ورکوي دا ده چې د دې ټولو ناخوالو پر وړاندې د هیواد اصیل بچي چې د ولس له غېږې او متنه یې تشکیل کیږي په پوره ایمانداري، صدق، اخلاص او د وطن سره په مینه کلک ولاړ دي، تل یې د هر غله، غاصب او جاسوس لاس غوڅ کړی او غاښ ماتونکی ځواب یې ورته ویلی، د هیواد دا اصیل بچي طالبان دي چې د افغانستان د اسلامي امارت تر قیادت لاندې ټوپک پر اوږه د کفارو او د هغوی د معاوینینو پر وړاندې مبارزه کوي.
د افغانستان اسلامي امارت واقعا د افغان ولس له غېږې خپلې لښکرې تشکیلوي، د ولس ګټې یې، ګټې دي او د ولس د ارمانونو د پوره کولو لپاره په سر او مال ولاړ دی، اوس چې د اشغال اولس کلونه تیرېږي د اسلامي امارت د سپېڅلې مقاومت په پایله کې د ملت نیمګړې ارمانونه نور پر پوره کېدو دي، امریکا د افغانانو څخه ماته خوړلې ده او د خپلو لښکرو د ایستلو لپاره طرز او برنامې لټوي، په هیواد کې دننه خاینان، غله، مفسدین، غلامان او د غرب جاسوسان هم هڅه کوي چې د خارجیانو د تېښتې سره دوی هم له هیواده پښې سپکې کړي او په امریکا، کاناډ او انګلیستان کې د خپلو بادارانو سره د غربیانو غوندې لوېدلی او د حیوانیت ژوند وکړي.
افغانانو! دغه زېری درکوم: که د روان یرغل په دوام کې جګړه سل کاله هم دوام وکړي خو افغانستان بیرته افغان ولس ته پاتي دی، دا خاوره، دا هیواد او دا ملت به د اسلامي امارت تر قیادت لاندې د اسلامي شریعت په رڼا کې خپل نظام او خپل کور جوړوي.
ان شاءالله
