(کابل ټکی کام، ۱۳۹۸، زمری ۲۰)
یوه متقاعد امریکايي جنرال پول اېټان یوس اې ټوډی ورځپاڼې ته ويلي، چې امریکا افغانستان کې د ترهګرۍ سره د مبارزې لپاره تر دوو لسيزو جګړه وکړه خو اوس د دې وخت دی چې بايد امريکايي ځواکونه افغانستان پريږدي.
نوموړی جنرال وايي، د افغانستان جګړه لکه د عراق د جګړې په څير پای نه لري او پر یادې جګړې د کنترول لپاره د امريکايي ځواکونو پاتې کيدل او نه پاتې کېدل د امریکا لپاره ګټور نه دي.
جنرال پول اېټان وايي، افغانستان کې د امریکا بې ګټې حضور او د جګړې اوږدوالي ته په کتو بايد جګړه ختمه او امریکايي ځواکونه له دغه هيواده و ايستل شي.
امريکايي جنرال له افغانستانه د ځواکونو د ايستلو په تړاو د یو شمير امریکايي سياستوالو اندېښنې بې ځايه بللي په وينا يې دغه هيواد کې القاعده ختمه شوې او د امريکا د امنيت لپاره ګواښ نشته.
په وروستيو کې په امريکا کې ډيری سياستوال، پوځي شنونکي او د امريکا د پوځ پخواني جنرالانو په افغانستان کې د امریکايي جګړې دوام لپاره مخالف نظرونه ورکړي او د خپلو عسکرو ايستل غواړي.
