(کابل ټکی کام ۱۳۹۷ غویی ۲۱)
د فاریاب د ولایتي شورا غړو نن د دې ولایت د احتمالي سقوط څخه خبر ورکړ او پر دولت او بهرنیانو یې غږ وکړ چې که ژر تر ژره د دې ولایت په ستراتیژیکو سیمو چې طالبان په کې واکمن دي، عملیات پیل نه کړي، په لنډ وخت کې به د دې ولایت لس سلنه واکمني چې د دولت تر حاکمیت لاندې ده هم سقوط وکړي.
د دې ولایت د ولایتي شورا رئیس محمد طاهر رحماني وایي؛ د بل چراغ له سقوط سره ۷ ولسوالۍ د سقوط له جدي خطر سره مخ دي “ دولت د بل چراغ ولسوالۍ د بیا نیولو ادعا کوي خو له مرکز پرته نورې ټولې سیمې اوس هم له طالبانو سره دي“
نوموړی زیاتوي؛ د بلچراغ له سقوط سره ۶۰۰ تنو امنیتي ځواکونو او سیمیزو پاڅون کونکو د ګریزیوان ولسوالۍ ته شاتګ کړی چې اوسمهال په یاده ولسوالۍ کې په سخته محاصره کې ګیر پاتې دي.
رحماني زیاتوي، د ګریزیوان له سقوط سره چې اوس محاصره ده د دې ولایت د کوهستان، پشتونکوت، المار، خواجه سبزپوش، شیرین تګاب او دولت آباد سقوط ته به په اسانۍ سره لار هواره شي.
بل خوا بیا د ولایتي شورا مرستیال صبغت الله سیلاب وایي؛ د دې ولایت له څلورو ولسوالیو اندخوی، قرمقول، قرغان او خان چارباغ، پرته د فاریاب ٩٩ سلنه خاوره یا د طالبانو تر حاکمیت لاندې ده او یا هم د سقوط شیبې شمیري.
نوموړی زیاتوي؛ د بل چراغ په سقوط کې تر ۴۰ ډیر امنیتي ځواکونه ووژل شول ۵۳ طالبانو ژوندي ونیول او د وسایطو سربیره ۵۷ مختلف النوع وسلې د طالبانو لاس ته پریوتې.
نوموړی خبرداری ورکوي چې، که طالبانو ته محاصره ۶۰۰ ځواکونه تسلیم شول دې ډلې ته به تر ۱۰۰۰ میله ډیرې وسلې غنیمت او تر څنګ به یې لسګونه عرادې وسایط په لاس ورشي چې په مټ به یې وکولی شي د میمنې ښار په اسانۍ سره سقوط او د ولسوالیو په ګډون یې تر خپل حاکمیت لاندې راولي.
