(کابل ټکی کام، ۱۳۹۷، غبرګولی ۳۱) د بلخ ولايت سيمه مسئولين، په دغه ولايت کې د یو ميليون ډالرو په ارزښت د کرکټ د معیاري لوبغالي د جوړېدو خبر ورکوي.
د هیواد په شمال او شمال ختیځ کې د کرکټ بورډ مسوول خالق داد نوري وايي، دا ميدان به د هند د يو ميليون ډالرو په مالي مرسته په څوارلس جريبه ځمکه کې جوړ شي چې د شل زره کسانو د ناستې لپاره به ځای ولري.
په افغانستان کې د هند سفير ويني کمار بلخ ولايت ته د سفر پر مهال وويل، هېواد به يې په افغانستان کې د سپورت او کرکټ د ودې لپاره نورې مرستې هم وکړي.
په عين حال کې د بلخ والي محمد اسحاق رهګذر وايي، په دغه ولايت کې به د کرکټ لوبغاړو لپاره لا زياتې اسانتياوې برابرې کړي.
تر دې مخکې ورزشکارانو په بلخ کې د کرکټ د معياري لوبغالي د نه شتون له کبله شکایت درلود خو د کرکټ د نوي لوبغالي د جوړېدلو هرکلی کوي وايي د ياد ميدان په جوړېدو به دغه ولايت کې کرکټ لا وده وکړي.
