کابل ټکی کام (جمعه، ۸ ليندۍ، ۱۳۹۸ل)
يمن کې حوثي وسلوال وايي، چې ديو بريد په ترڅ کې يې د سعودي په مشرۍ دعرب ايتلاف يوه پوځي الوتکه نسکوره کړې چې په پايله کې يې دوه پيلوټان وژل شوي دي.
د “رویټرز خبري اژانس” د حوثي وسلوالې ډلې د وياند جنرال “یحیی ساريه” له قوله ليکلي چې دغه پوځي چورلکه د يمن او سعودي ګډې پولې ته نيږدې د حوثيانو په ډزو ويشتل شوې او دوه پيلوټان هم په کې وژل شوي دي.
د سعودي عربستان حکومت تر اوسه په دې هکله څه نه دي ويلي.
ياده دې وي چې له ۲۰۱۵م کال راهيسې سعودي د متحده عربي اماراتو، سوډان، مصر او ګڼ شمېر نورو عربي هېوادونو په مرسته په يمن کې د حوثيانو په وړاندې جګړه پيل کړې، خو تر اوسه يې کومه دپام وړ بریا نه ده ترلاسه کړې.
