غزه کې د اسرائیلي ټانګ ډزو، یوه فلسطینۍ مېرمن وژلې
کابل ټکی کام ۱۷غويي/۱۳۹۵، سمسور ګیلاني
د نړیوالو خبري رسنیو د خبر له مخې چې اسرائیلو د غزې له فلسطینیانو سره دا ځل ناوړه او عجیب جنایت ترسره کړی دی، چې یوه فلسطینۍ مېرمن یې د ټانک په ډزو وژلې ده.
العالم خبري اژانس د ځايي مسئولینو له قوله لیکلي دي، چې د اسرائیلي ټانګ په ډزو کې یوه فلسطینۍ مېرمن وژل شوې ده، او بله ټپي شوې ده.
له بلې خوا اسرائیلو د دغې پېښې په تأیید کې ویلي دي، چې دوی د ټانګ دغه ډزې د فلسطینیانو د راکټ په ځواب کې کړي دي.
په فلسطین کې مبارز حماس اسلامي غورځنګ ویلي دي، چې د اسرائیلو له خوا په غزه کې نوي جنایتونه او حملې د زغملو نه دي.
د یادولو ده، په ۲۰۱۴ میلادي کال کې هم اسرائیلو په غزه کې پر ناوړه جنایتونو لاس پورې کړی وو، چې د ځمکني او هوايي بریدونو په مټ یې په پنځوسو ورځو کې لږ تر لږه ۲ زره ۲۵۰ غیر نظامي فلسطینیان ووژل، چې زیاتره یې ښځې او ماشومان وو.
