کابل ټکی کام ۱۷غویي/۱۳۹۵، احمدالله مهاجر
په تازه ورکړل شویو راپورونو کې ویل شوي دي، چې له افغان حکومت سره د سولې د وروستۍ هوکړې د لاسلیکولو لپاره حکمتیار کابل ته راځي.
د راپورونو پر اساس چې حکمتیار به د سولې دغه هوکړه په کابل کې له ولسمشر غني او د سولې عالي شورا له مشر پیر سید احمد ګیلاني سره لاسلیک کړي.
د سولې عالي شورا یو شمېر غړو هم تأیید کړې ده، چې له حزب اسلامي سره یې موافقه نهایي شوې، او ارزومند دي، چې د وروستۍ هوکړې د لاسلیک لپاره به حکمتیار خپله کابل ته راشي.
څو ورځې وړاندې د سولې عالي شورا ویلي وو، چې د حکمتیار له لورې په ۲۵ شرطونو کې یوازې پر ۵ شرطونو هوکړه نه ده شوې، چې هغه د دوی په واک کې نه، بلکې د ولسمشر په واک کې دي.
یو شمېر خلک وايي، چې د افغان حکومت سره د حکمتیار سوله به طالبان دې ته وهڅوي، تر څو د سولې خبرو کې ګډون وکړي.
مګر د هېواد سیاسي کارپوهان وایي، طالبان دا مهال د هېواد په ډېری برخه واکمن دي، او غواړي چې پر خپلو مټو خپل نظام حاکم کړي، د سولې خبرو ته هېڅ حاجت نه لري.
