سرلیکنه
تيره ورځ د ولسمشر لومړي مرستيال جنرال دوستم يو ځل بيا اشرف غني په قوم پالنه تورن کړ ویې ويل: اشرف غني اوعبدالله دواړه په ناسمو سياستونو هيواد د بربادۍ په لورې روان کړی دى.
دوستم چې په شبرغان کې یې د خپلو ازبک مليشو يوې پراخې غونډې ته وينا کوله په هيواد کې روان وضعيت یې د انديښنې وړ وباله ویې ويل، عبدالله او اشرف غني دې نور ملت نه ځوروي او نه دې د خپلو پلويانو په دندو ګمارلو کې په حکومت کې بې واکي رامنځته کوي .
جنرال دوستم په ښکاره وويل که اشرف غني يواځې خپلو خلکو ته کارکوي او د خپل ولايت لوګر لپاره هر ډول اسانتيا ورکوي او بې له خپلو خلکو یې نورڅوک نه خوښيږي، نو حکومت به تر ډيره ونه پايي .
دوستم په ښکاره وويل، د حکومت د دواړو مشرانو ناسم تصميمونه د دې سبب شوي، چې د چارو واګې تردې زياتو نا اهلو او کمزورو اشخاصو لاس ته ورشي چې بيابه یې هيڅ ډول سمونه، نه کيږي .
د دوستم دې څرګندونو د حکومت يو شمير چارواکي انديښمن کړي دي چې حکومت د څو کسانو لخوا کلابند دى او دا کلابندي به تخر عبدالله او اشرف غني دواړو ته په تاوان تمامه شي .
د حکومت په منځ کې د دوستم سره د عبدالله او اشرف غني ناباوري دا راپه ګوته کوي چې د دواړو خواو ناباوري اوج ته رسيدلې ده او د شپږو مياشتو په تيريدو سره راولاړه شوې نا باوري تراوسه له منځه نه ده تللې.
راپورونه وايي ،چې دوستم له غورماچ څخه د اعتراض په توګه په شاتګ کړی دى چې د هغه مليشو سره د دفاع ورزارت مرسته نه کوي او د جګړې ټول تاوانونه دوستم په خپل سر ګالي.
د دوستم تير تاريخ ته په کتوسره شناندي په دې نظر دي، چې که دوستم د حکومت پر خلاف يوځل په چپه واوخت نو بيا یې سمول ګران دي؛ خو د دوستم لپاره تر اوسه داسې څوک په لاس نه دي ورغلي چې د حکومت د نسکورولو وروسته ورسره د واکمنۍ نورې چارې سمبالې کړي، ځکه خو دوستم اشرف غني ته له صبره کاراخلي.
د کمونستي نظام وروستۍ سلګۍ وې، که ډاکټر نجيب هرڅو کوښښ کاوه خو نور کمونستي نظام د پاتې کيدو نه و چې دوستم هم ورسره مخالف شو په درې ورځو کې یې د ډاکټرنجيب حکومت نسکور کړ.
داسې نظرونه شته که دوستم د حکمتيار نمايندګانو سره وکتل شايد د اوږدوليدنو او مشورو وروسته يو توافق ته ورسيږي، چې که هروخت دوستم په موجوده اداره کودتاکوي نو د حکومت د نورو چارو سمبالوونکي به یې کودتا د کاميابۍ ترحده ورسوي، ځکه دوستم او حکمتيار د زرګونو افغانانو د مرګ ژوبلې او جنګونو وروسته خپلوکې سره ائتلاف کړى و، چې شايد يو ځل بياهغه د قدرت ائتلاف له سره شي.
د دوستم دا نيوکه چې په ولايتونو کې قوماندانان د هغه سره سم چلند نه کوي بايد د هغه د خوښې وړ کسان د جګړې قوماندانان وټاکل شي او دا د ځان لپاره حق بولي، که د دوستم غوښتنې ومنل شوې نو بيا کولای شي د خپلو مليشو ترڅنګ د دفاع وزارت پر قوماندانانو هم د کودتا پرمهال امر وکړي او ټول قوت په خپله خوا راوڅرخوي.
که د دوستم څخه د اشرف غني اوعبد الله دا ډول انديښنه نه وای نو د جګړې په لومړي خط کې تر دوستمه بل ښه قوماندان نه ليدل کيږي؛ خو اشرف غني او عبدالله نه دوستم يو خواته کولای شي او نه یې ځانته رانږدي کول د ځان لپاره په ګټه بولي.
