د ننګرهار والي ګلاب منګل د بریښنا ریاست کار کوونکي ډبولي
(کابل ټکی کام ۱۳۹۵ لیندۍ۱۰) زرغون خوږیاڼی
د ننګرهار والي ګلاب منګل ددغه ولایت د بريښنا ریاست د کارکوونکو سپکاوی کړی او هغوی یې وهلي ډبولي دي.
د ولایت له مقام څخه یوې امنیتي سرچینې کابل ټکی کام ته وویل، چې ګلاب منګل د بریښنا رئیس وحیدالله پوپلزی او د ریاست نور کارکوونکي تر وهلو ډبولو وروسته د خپلو شخصي ساتونکو په توسط رینجر موټرو ته اچولي او له ځانه سره یې نامعلوم لوري ته وړي دي.
څو ورځې وړاندې د ننګرهار د بریښنا ریاست خبر خپور کړ، چې په دغه ولایت کې لوړپوړي دولتي چارواکي او دولتي ادارې د بریښنا ریاست پوروړي دي او نه غواړي خپله پور ادا کړي چې نږدې په میلیونونو افغانۍ کیږي.
د بریښنا رئیس ډاکټر وحیدالله پوپلزي ويلي وو، چې په دغه پوروړو کې د ولسي جرګی غړی ظاهر قدیر، د ښار والۍ، حج اوقافو، پوهنې، اطالاعاتو فرهنګ، د اوبو رسولو، مخابراتو، ټولګټو پروژو، محکمې، د کار او ټولنیزو چارو او د کانال ریاستونه، همدارنګه د ولایت مقام، ننګرهار رادیو تلویزیون، د عامې روغتیا روغتون، ننګرهار محبس، د ولایتي شورا ودانۍ، ولایتي شورا ودانۍ، نظامي کمیسیون، امنیه قومندانۍ، سرحدي لواء، ننګرهار پوهنتون او هوايي ډګر، میکانیزم ښوونځی شامل دي، چې په میلیاردونو افغانۍ پوروړي دي؛ خو تر اوسه د بیل تحویل کولو کومه اراده نه لري.
د بریښنا ریاست د ۱۵ ورځو وخت ورکولو وروسته د بیل نه تحویل کولو په صورت کې د ولایت مقام او ځینو نورو ادارو بریښنا قطع کړه، چې ددې ولایت نوي والي ګلاب منګل یې په اړه کلک غبرګون څرګند کړ او د یاد ریاست کارکوونکي یې په غیر قانوني توګه وډبول.
د کابل د بریښنا شرکت ویاند وحیدالله توحیدي ویلي، چې د ننګرهار د والي ګلاب منګل شخصي ساتونکو ددغه ولایت د بریښنا رئيس وحیدالله پوپلزي په کور چاپه وهلی او نوموړی ته یې سپکاوی کړی، توحیدي د ګلاب منګل دغه کار غیر قانوني ګڼلی او رد کړی دی.
د ننګرهار ولایت اوسیدونکو له مرکزي حکومت څخه غوښتنه کړې، چې په دې اړه له ګلاب منګل څخه د غیر قانوني کړنو په اړه پلټنه وکړي او یاد والي دې له دندې ګوښه کړي.
تر اوسه پورې ددولت مطبوعاتي سرچینې په دې اړه چوپه خوله دي.
