ټرمپ غواړي بيت المقدس د اسراييلو پلازمېنه اعلان کړي
(کابل ټکی کام، ۱۳۹۶، لیندۍ ۱۲) د ورکړل شويو راپورو پر بنسټ د امريکا ولسمشر ډونالډ ټرمپ غواړي، د راتلونکې چهارشنبې په ورځ بيت المقدس د اسراييلو د پلازمېنې په توګه اعلان کړي.
دغه څرګندونې رويټرز خبري اژانس ته د ټرمپ د ادارې دوو لوړ رتبه چارواکو کړي ويلي يې دي، د امريکا ولسمشر ښايي د راتلونکې چهارشنبې په ورځ په يوه خبري غونډه کې بيت المقدس د اسراييلو پايتخت اعلان او په رسميت وپېژني.
د چارواکو په وينا، که څه هم امريکا به د اسراييلو پايتخت بيت المقدس اعلان کړي، خو په خبره يې له تل ابيب څخه به په سمدستي ډول د امريکا سفارت نه انتقالېږي، دا به وروستۍ مسله وي.
په عين حال کې د ټرمپ ادارې ته نږدې يوې بلې سرچينې رويټرز ته ويلي، تر دې دمه بيت المقدس ته د اسراييلو د پايتخت انتقالولو وروستۍ پريکړه نه ده شوې، ښايي دغه پلان بدل شي.
د امريکا ولسمشر ډونالډ ټرمپ د خپل انتخاباتي کمپاين پر مهال وعده کړې وه، چې د امريکا سفارت به بيت المقدس ته انتقالوي.
دا په داسې حال کې ده، چې نړيواله ټولنه په بيت المقدس کې د اسراييلو د ملکيت دعوه په رسميت نه پېژني.
په ورته وخت کې د فلسطين واکمنې ادارې په فلسطين کې د اسراييلو د ملکيت دعوې رد کړي او د دغو کړنو په اړه يې خبرداری ورکړی، چې ناوړه پايلې به ولري.
د فلسطين د ولسمشر محمود عباس وياند نبيل ابو ردينه ويلي، د امريکا له خوا بيت المقدس د اسراييلو د پايتخت په توګه په رسميت پېژندل به د اسراييلو او فلسطين د سولې راولاړې شوې خبرې يوځل بيا له منځه يوسي.
فلسطينيان غواړي د بيت المقدس شرقي برخه د دغه هېواد راتلونکې پلازمېنه شي او د اسراييلو د هر ډول اشغال مخه ونيسي او هغې سره مخالفت کوي.
د محمود عباس وياند وايي، د اسراييلو او فلسطين تر منځ د اختلافاتو د له منځه وړلو لپاره يواځينۍ د حل لاره د اسراييلو له خوا د بيت المقدس شرق سيمه د فلسطيني دولت د پايتخت په توګه په رسميت پېژندل دي.
اسراييلو په ۱۹۶۷ کال کې د شپږ ورځنۍ جګړې په ترڅ کې د بيت المقدس شرقي سيمه ونيوله او بيا يې د خپلې خاورې پورې ونښلوله، هغه کړنه چې نړيوالې ټولنې تر اوسه په رسميت نه ده منلې.
