(کابل ټکی کام، ۱۳۹۸، غبرګولی ۸)
پرون په مسکو کې د افغانستان او روسيې د سل کلونو دپلوماتيکو اړيکو په لمانځغونډه کې د طالبانو څوارلس کسيز پلاوي او د افغانستان حکومت استازو، پخواني ولسمشر حامدکرزي او د بيلابيلو ګوندونو څلورويشت استازو او سياستوالو ګډون کړی و.
که څه هم دا ناسته د دواړ هيوادونو د سل کلنو دپلوماتيکو اړيکو لمانځنې لپاره وه او د غونډې دويمه ورځ د افغانانو خپلمنځۍ ناستې ته ځانګړې شوې وه خو ځينو افغان سياستوالو او ګوندونو استازو خبرې داسې پيل کړې چې ګوندې روانه غونډه د طالبانو سره د خبرو لپاره ده.
عطاءمحمد نور په پرونۍ غونډه کې خپلې خبرې اوږدې کړې او له طالبانو يې د روژې په مياشت کې د اوربند غوښتنه وکړه چې د افغانستان لپاره د روسيې ځانګړي استازي کابلوف له خوا ورته وويل شول چې اوس مهال د افغان روس په دپلوماتيکو اړيکو وغږيږه د سولې خبرې به بيا وکړې.
دغه راز په یاده غونډه کې د ګډ حکومت استازو د سولې عالي شورا مشر کريم خليلي او په مسکو کې د افغانستان سفير لطيف بهاند هم ګډون کړی و خو په مسکو کې د طالبانو د څوارلس کسيز پلاوي غړی او د قطر دفتر وياند سهيل شاهين تازه په خپله رسمي ټويټرپاڼه ليکلی، چې په ننيو بين الأفغاني تفاهم غونډو کې به کريم خليلي او افغان سفير نه وي ” دماسکو پروني غونډه د روسیې او افغانستان دسل کلنو دیپلو ماتیکو اړیکو په اړه وه، چي دکابل ادارې استازي هم پکي و زياتوي خو نن به دبین الافغاني تفاهم په غونډو کې عبدالکریم خلیلي او د کابل ادارې سفیر نه وي.”
