کابل ټکی کام (جمعه ، ۳۱ غبرګولی ، ۱۳۹۸ل)
ټاکل شوې سبا د شنبې په ورځ د پاکستان د مرې په بوربن سیمه کې د افغان سولې په اړه د جنوبي اسیا د ستراتیژیک ثبات بنسټ لخوا غونډه تر سره شي.
ویل کېږي چې دې غونډې ته د اسلامي حزب مشر ګلبدین حکمتیار، د جمعیت اسلامي مشر عطامحمد نور، د اجرایه رییس دویم مرستیال محمد محقق، عبدالطیف پدرام او د ملي محاذ ګوند مشر حامد ګیلاني ګډون وکړي.
دې غونډې ته پخوانی ولسمشر حامد کرزی هم بلل شوی وو چې نوموړي دخپل عذر په پېش کولو سره د خپل نه ګډون خبر ورکړ.
کرزي په اسلام آباد کې د افغان سولې په تړاو ،د سبا ورځې پيليدونکي کنفرانس هرکلی کړی او له پاکستان يې مننه کړې ده چې ده ته يې هم په دغه کنفرانس کې د ګډون بلنه ورکړې وه.
نوموړي په يوه اعلاميه کې ويلي چې د وخت نشتوالي له وجې کنفرانس کې ګډون نه شي کولای او مناسب فرصت کې به پاکستان ته سفر وکړي.
کرزي دغه کنفرانس ته د برياليتوب د هيلې تر څنګ له پاکستان غوښتي چې د سولې کوښښونه همداسې جاري وساتي.
