داعش د خپلو جنګیالیو میاشتینۍ تنخواوې ۵۰ فیصده کمې کړي دي

کابل ټکی کام (چهارشنبه ۳۰ مرغومي ۱۳۹۴ ل) فرید احمد
داعشي مشران خپلو جنګیالیو ته د نورو ملکونو د فوځ په شان تنخوا ورکوي، او برخلاف یې، د نړی له ګوټ ګوټ څخه د پیسو په زور جنګیالي پيدا کوي. خو داچې جګړه زیاته خرڅه لري د خپلو جنګیالیو په تنخوا او اعاشه کې یې ۵۰ فیصده کموالۍ راوستی دی.
د داعش د ډلې څخه راوتلي اسناد وايي، پدې وروستیو کې، د سیمې هېوادونو د فشار له کبله پدې ډله کې مشکلات زیات شوي دي، او د خپلو جنګیالیو تنخواګانې یې نیمی کمې کړي دي.
د داعش ډله خپلو جنګیالیو ته په فرق سره له ۴۰۰ ډالرو تر ۱۲۰۰ ډالرو پورې میاشتینۍ تنخواوې ورکوي، او د خپل هر جنګیالي ښځې ته ۵۰ ډالره او اولادونو ته یې ۲۵ ډالره د میاشتې خرڅ مقرر کړی دی.
د داعش ډله نړیوالو د تروریستانو په لست کې شامله کړې ده خو د زیاترو هېوادونو خفیه ادارې په یقین سره وايي چې د ناټو لخوا د عراق او سوریې بعضې ځمکې داعش ته سپارل شوي دي، ترڅو په سیمه کې د اسلامي هېوادونو ترمنځ د شیعه او سني په نامه جګړه ييز توازن برقرار وساتي.
اوس داسې بریښي چې د داعش وسله واله ډله د اسد او عراقي فوځیانو په خلاف کمزورې شوې ده او نشي کولای چې خپل جنګیالي د پخوا په څېر خوشاله وساتي، ځکه زیاتره ښایسته وینځې او غلامان د مشرانو په خدمت کې وي، په خپله بغدادي ۸ بهرنۍ وینځې لري چې عمرونه یې له ۳۰ کالو څخه کم دي.
خپاره شوي اسناد زیاتوي، چې د داعش د مشرتابه لخوا پدې فرمان کې ټولو جنګیالیو ته امر شوی دی چې تنخوا به نور نیمۍ ورکول کیږي او دا کار په هر چا لازم دی.
دغه پټ خپاره شوي اسناد د منځنۍ اسیا یو لوی عالم ایمن جواد التمیمي ته په لاس ورغلي دي.
تمیمي دا اسناد له الرقه ښار څخه چېرته چې داعش خپل خلافت اعلان کړی دی، ترلاسه کړي دي.
داعش خپلې زیاتې پیسې د جزیې په نامه له عامو وګړو څخه اخلي، په ښوونځیو کې هم له شاګردانو څخه فیسونه ددوی بانکي حسابونو ته ځي، او له دوی سره زیات د تېلو ذخایر هم موجود دي، چې تېل یې په تور بازار کې خرڅوي، او پیسې یې په خپلو جنګیالیو تقسیموي. خو دا چې پدې وروستیو کې روسانو د دوی د تېلو ذخایر په نښه کړل دوی ته درانه مالي زیانونه واړول، چې دادی مشرانو یې هم خپلې خرڅې کمې کړي دي.
د امریکا د خزانې وزارت وايي چې د ۲۰۱۵ م کال په سر کې داعش له تېلو څخه ۴۰ میلیون ډالر ترلاسه کول او اوس دا رقم له نیم څخه هم کم شوی دی.
د ملګرو ملتونو څیړنیز راپور وايي، ددې په خاطر چې داعش خپل نظام ژوندی وساتي د لوړ تعلیم انجینرانو ته ۱۵۰۰ ډالره د میاشتې تنخوا ورکوي.
د داعش ترټولو خوشبخت کال هغه وو چې په هماغه کال کې یې دوه میلیارده ډالر ترلاسه کړل، خو دا رقم ددوی لپاره شونۍ نه ښکاري.