کابل ټکى کام (سه شنبه ، ٣٠ تله ، ١٣٩٨ل)
د پاکستان د یو مهم او مطرح اسلامي سياسي ګوند مشر د صدراعظم عمران خان دحکومت د نسکورولو ګواښ تکرار کړ.
د جمعیت علماءاسلام ګوند مشر مولانا فضل الرحمن په یوه خبري غوڼډه کې د عمران خان حکومت “غير قانوني” وباله او په وينا يې چې هغه د پاکو ټاکنو له لارې نه بلکي د پاکستاني د
پوځ له لوري واک ته رسول شوی دی.
د هغه په وينا: “مونږ اراده لرو چې د اسلام آباد په لور يو پراخ لاریون تر سره کړو. زمونږ اصلي مقصد داده هغوى چې واکمنۍ يې هیڅ قانوني بڼه نه لري، باید سمدستي استعفا وکړي.”
عمران خان تیر کال د فساد په ضد د مبارزې او د پاکستان د اقتصادي وضعیت د رغولو په شعارونو ټاکنې وګټلى، خو د حکومت د جوړولو راهیسې يې تر اوسه د پاکستان اقتصاد نه دی ښه شوی.
عمران خان د خپلو سیاسي مخالفينو ادعاګانې چې وایي د پاکستاني پوځ په ملاتړ واک ته رسیدلی نه مني. د پاکستان پوځ او د هغه هیواد دټاکنو دکمېسيون چارواکو هم د عمران خان د سیاسي مخالفینو ادعاوې رد کړې دي.
مولانا فضل الرحمن د پاکستان يو له هغو مهمو سیاسي مشرانو څخه دی چې د یو ستر سیاسي ګوند او دحکومت دمخالف ایتلاف مشري کوي او د پاکستان په پارلمان او ولایتي شوراګانو کې هم څوکۍ لري. هغه همداشان د پاکستان په ښوونځیو او دیني مدرسو کې هم دپام وړ نفوذ لري.
د پاکستان د پخوانیو وزيراعظمانو نواز شریف او بینظیر بوټو د ګوندونو پاکستان مسلم ليک “ن” اود پاکستان دخلکو يا “پيبلز” ګوندونو په شمول د پاکستان یو شمیر نور سیاسي ګوندونه وايي چې د عمران خان په خلاف د مولانا فضل الرحمن د مبارزي ملاتړکوي.
د تحريک انصاف واکمن ګوند ویلي دي چې حکومت يې تیار دی چې د خپلو سیاسي مخالفانو سره خبرې وکړي، خو وايي چې هیچا ته ددې اجازه نه ورکوي چې په اسلام آباد کې دخلکو ورځنی ژوند ګډوډ کړي.
