کابل ټکى کام (جمعه، ۱۰ لړم ، ١٣٩٨ل)
یوشمېر حکومتي سرچینو خبر ورکړی چې د افغان سولې لپاره د واشنګټن استازی زلمی خلیلزاد پرون ماښام کابل ته راغلی او ځینې لوړ پوړو حکومتي چارواکو سره په خبرو اترو بوخت دی.
یاد حکومتي چارواکي زیاتوي، خلیلزاد هڅه کوي چې طالبانو سره د بندیانو پر یوې داسې تبادلې خبرې وکړي چې له مخې یې د پوهنتون د دوو تښتول شویو بهرنیو استادانو خوشې کېدو ته لاره هواره شي.
اسوشېټېډ پرېس خبري اژانس په یو راپور کې د یو شمېر داسې چارواکو له خولې چې د ښاغلي خلیلزاد له هڅو خبر دي، وايي چې زلمی خلیلزاد د ګډ حکومت او طالبانو ترمنځ د بندیانو د تبادلې په دې هڅو غواړي چې هم دا دوه بهرني استادان خوشې شي او هم د سولې بهیر بېرته پیل شي.
په کابل کې د امریکايي پوهنتون دوه استادان امریکايي کیون کینګ او استرالیايي ټېموتي ویکز له ۲۰۱۶ میلادي کال څخه له طالبانو سره برمته دي.
اسوشېټډ پرېس خبري اژانس په دې اړه په راپور کې وايي، طالبانو دیادو استادانو په بدل کې دخپلو اتیا تنه لوړ پوړو نظامي قومندانانو غوښتنه کړې ده.
راپور کې راځي، د هغو اتیا کسانو په ډله کې چې طالبان یې د خوشې کېدو غوښتنه کوي، د طالبانو د مشر د مرستیال سراج الدین حقاني ورور انس حقاني هم شامل دی.
انس حقاني له څو کلونو راهېسې د افغانستان له حکومت سره بندي دی.
په کابل کې د خلیلزاد له بحثونو خبرو چارواکو دې خبري اژانس ته ویلي، د بندیانو د تبادلې دا بحثونه د هغو غوښتنو له کبله ستونزو سره مخ دي چې ګډ حکومت وايي، طالبان دې د بندیانو د هر ډول تبادلې مخکې اوربند سره موافقه وکړي.
طالبانو تر اوسه په دې اړه څه ندي ویلي.
