کابل ټکى کام (جمعه، ۱۰ لړم ، ١٣٩٨ل)
نن ماسپښین مهال د زابل په مرکز کلات کې سلګونو موټر چلونکو د پوليسو له لوري د یوه موټر چلوونکي د وژل کېدو په غبرګون کې د کابل – کندهار لویه لار د ترافیکو پرمخ تړلې ده.
په دغه اعتراض کې تر څلور سوه زیات موټر چلوونکي برخه لري او د لارې د بندېدو له کبله هم تر پنځه سوه زیات بار وړونکي او کوچني مسافر وړونکي موټر بند پاته دي.
یاد موټر چلونکی وروسته تر هغه وژل شوی چې په یاده لار یو حکومتي پولیس ترې ۱۵ زر روپۍ غوښتي، او ده ورته ۷۰ زره روپۍ ورکولې.
هغه ویډیو چې ټولنیزو رسنیو کې لاس په لاس کیږي، یو سپین ږیری مسافر فریاد کوي چې په یاده لاره له هر یو موټر ۳۰ زره افغانۍ اخیستل کیږي او که څوک انکار وکړي؛ سزا یې مرګ ده.
دا مسافر د وژل شوي موټر چلونکي په اړه زیاتوي، پولیسو ترې ۱۵ زره افغانۍ غوښتې خو ده سره تر ۷ زره ډیرې نه وې، هغه یې ورکړې؛ خو بیاهم ووژل شو.
دا مسافر له خلکو دمرستې غوښتنه کوي او وایي، زموږ مرسته وکئ، دلته ظلم روان دی، هر مسافر وهل کیږي، او حتی زنانه هم په امن نه دي.
تر اوسه دولتي لوري په دې اړه څه نه دي ویلي، خو دا لار له ډیرې مودې راهیسې د دغسې پیښو شاهده ده.
