کابل ټکی کام (سه شنبه، ۲۱ لړم، ۱۳۹۸ل
د اسلامي نړۍ ۸۷ تنو ديني علماوو په مسلمانانو او ځانګړي ډول عربانو غږ کړی، چې له متحده عربي اماراتو سره سیاسي او اقتصادي اړيکې د هغه څه له امله پرې کړي چې دوی يې په یمن او لیبیا کې د مسلمانانو وینه تويېدنه بولي.
علماوو په یوه خپرپاڼه کې ویلي چې متحده امارات خپلې پیسې د نړۍ په ټولو برخو کې د مسلمانانو د وژلو لپاره کاروي.
په بيان کې راغلي: “دا له هيچا پټه نه ده، چې متحده عربي امارات د مسلمان وژنې د جنایت لوړې کچې ته رسیدلي. د مسلمانانو په وړاندې یې هیڅ راز دښمني نه ده سپمولې- که هغه د هیوادونو په کچه وي ، لکه د اولسمشر په توګه د منتخب اولسمشر محمد مرسي پروړاندې او يا لکه په لیبیا او یمن کې. او یا د اقليتونو په کچه وي ، لکه د چین (ایغور) یا د کشمیر خاوره کې هم دوی په پټه او ښکاره توګه د مسلمانانو په خلاف ولاړ دي.
متحده عرب امارات، وسلې ، توغندي ، الوتکې او مزدوران په پیسو اخيستي ، او بيا یې د مسلمانانو د وژلو او د هغوی ښارونو ویجاړولو لپاره لیږلي.”
دغو علماوو د ټولو اسلامي هیوادونو پر حکومتونو او خلکو غږ کړی، چې متحده اماراتو سره خپلې ټولې اړيکې وشلوي ، د دوی جوړ کړي مصنوعات تحريم او له پیرودلو يې ډډه وکړي.
دوی له هغو سوداګرو- چې په متحده اماراتو کې میشته دي او ياد هيواد يې د خپل تجارت مرکز په توګه غوره کړی- غوښتنه وکړه ، چې له دوی څخه مخ واړوي ، او د دوی بندرونو تحریم کړي؛ ځکه چې دوی له دې لارې د مسلمانانو د وژلو لپاره خپلې جګړې تمویلوي، د دوی پیسې په ګناه او ظلم کې مرسته ده ، او الله سبحانه وتعالی فرمایي: (په نيکي او تقوی کې له یوبل سره مرسته کوئ، په ګناه او ظلم کې له يوبل سره مرسته مه کوئ)
اعلامیه کې ویل شوي چې په دې پیسو مسلمانان وژل کیږي، اجیران او مزدوران پرې اخیستل کيږي، او د مشروع حکومتونو پروړاندې کودتاوې پرې اداره کيږي ، او د عربي وګړو هغه خوبونه چې د ظلم او استبداد څخه خلاصون غواړي ، وژني. او د صهیونیسټانو سره د مسلمانانو په وژلو کې مرسته کوي.
