کابل ټکى کام (جمعه، ۸ لیندۍ ، ١٣٩٨ل)
لیکوال او شناند واحد فقیري افغانستان ته د ولسمشر ټرمپ په راتګ، او هلته خپلو سرتېرو سره په لیدو کتو یوه مفصله تبصره کړې، او دافغان جګړې پای یې د ټرمپ لپاره طلایي فرصت بللی دی.
دی وایي، جمهورریس ټرمپ پداسې وخت کې باګرام ته سفر وکړ چي دننه په افغانستان، امریکا، او سیمه کې د سولې د خبرو د بیا شروع کولو لپاره آوازونه تر بل هر وخت جګ سوي دي.
فقیري وایي، دا چې ټرمپ پر خپلې پخوانۍ فیصلې باندې پښېمانه سویدی، او د طالبانو سره یې مذاکرات بیا شروع کړيدي چې دا یو مثبت او رغنده ګام دی او باید ملاتړ يې وسي.
نوموړي دټرمپ راتګ ته اشاره کړې او لیکي، ټرمپ په بګرام کې وویل، امریکا د طالبانو سره مصالحه غواړي، او طالبان يې هم غواړي. د ټرمپ دا خبره کاملا درسته ده، د امریکا ۶۰ ٪ خلک له افغانستانه د خپلو عسکرو را ایستل غواړي، او پدې برخه کې د ټرمپ ملګري دي. البته، د افغانانو د نظرونو دقیقه سروې نده سوې، خو مطلق اکثریت يې د روغې جوړې پلويان دي.
فقیري زیاتوي، دغه راز، په سیمه کي هم د سولې لپاره پراخه اجماع موجوده ده. روسیه، چین، هند، ایران، پاکستان، عربي ملکونه، او نور هیوادونه هم د یوه سوله ایز حل ملاتړ کوي، او ټول پدې باور دي چي د افغانستان کشاله نظامي حل نه لري.
دی علاوه کوي، ټرمپ په بګرام کي وویل چي طالبانو پر اوربند باندې موافقه کړېده. که چیرې د امریکایانو او طالبانو تر مینځ — حتی یو مشروط — اور بند هم وسي، دا به نه یوازې د مطلق اکثریت افغانانو حمایت له ځان سره ولري، بلکې د دایمي سولې د راوستلو لپاره به یو مهم ګام وي.
تبصره کاږي، یوه خبره چې تر لمر روښانه ده، هغه دا چې ټولې خواوې له جنګه ستړي سوي دي. دواړه اشغالګران او اشغال سوي هم لدې عبث جنګه ستومانه سويدي.
تبصره کې دسولې په اړه دټرمپ تګلاره ستایلي او لیکي، د ټرمپ لپاره دا یو طلايي فرصت دی چي په افغانستان کيې د امریکا دوامداره او زیانمنه نظامي مداخله ختمه کړي، او پدې لاره کې جسورانه ګامونه واخلي. ټرمپ د دې کار د کولو اخلاقي جرأت لري، او ټرمپ د اوباما غوندې ډارن او مذبذبه نه دی.
فقیري هیله څرګندوي چې دا ځل ټرمپ پدې برخه کې په واشنګټن او کابل کې د جنګ طلبانو خبرو ته غوږ و نه نیسي، او د سوله پالو امریکایانو، افغانانو، او جهانیانو سره ملګری سي. پدې برخه کې، تاریخ د ټرمپ پر خوا دی.
