راټولوونکی: ډاکټر یوسف اکبري
د اردوغان ستر سلاکار د فلسطین د ساتنې لپاره د یوه اسلامي نظامي ځواک د جوړولو غوښتنه کړېده.
د ترکيې د ولسمشر رجب طیب اردوغان ستر سلاکار عدنان تنري فاردي، غوښتنه کړېده چې د اسرائیلو د بریدونو او تېریو پر وړاندې د فلسطین د د دفاع لپاره باید د اسلامي هیوادونو لخوا یو نظامي ځواک رامنځ ته شي، ځکه چې له فلسطینیانو سره نظامي ځواک نشته او اسرائیل هرډول پرمختللې نظامي وسلې لري چې پر فلسطینیانو باندې خپل بمونه راغورځوي، دا په داسې حال کې ده چې د ملګرو ملتونو اداره و نه توانېده چې د فلسطینیانو په ځمکه د اسرائیلو د جرایمو او د توکمیز چلند مخه ډب کړي.
عدنان تنري فاردي، چې په استانبول کې د اسرائیلي آپارتاید په اړه جوړ شوي کنفرانس کې خبرې کولې، وویل: (مونږ ته پکار دي چې د فلسطین د ساتنې په موخه یوه ځواکمنه نظامي قوه رامنځ ته کړو چې که اسرائیل پر فلسطین باندې کوم بم وغورځوي نو مونږ سمدلاسه و توانېږو چې پر تل ابیب باندې بم ګوزار کړو)
عدنان تنري فاردي زیاته کړه چې: ( یهودیان وايي مونږ د حضرت سلیمان علیه السلام عبادتګاه جوړول غواړو، مګر په همدغه پلمه يې هغه ټولې تاریخي نښې چې مسلمانانو او مسیحیانو پورې اړه لري له منځه یووړل، له همدې امله ټولو ذیدخله خواوو ته پکار ده، د اسرائیلو ددغه ډول ناوړه کړنو پر وړاندې لاس ترزنې کېنه ني).
ده همدا راز اشاره وکړه چې د فلسطین قضیه د اویا کلونو راهیسې روانه ده چې همدا قضیه د منځني ختیځ او د سیمې تر ټولو لویه او مهمه قضیه ده، همدارنګه د فلسطین خاوره د درې واړو ادیانو ( یهودیت، مسیحیت او اسلام) مشترک تاریخ لري مګر یهودیان غواړي چې د نورو ادیانو ټولې هغه دیني نښې نښانې له منځه یوسي، په خاصه توګه د مسلمانانو او مسیحیانو دیني نښې نښانې د یهودیت د نښو نښانو په حساب له منځه وړل غواړي.
له بل پلوه د المغرب پادشاه شپږم محمد د غزې په تراډه کې د مېشتو فلسطینیانو څخه د محاصرې دپای ته رسولو غوښتنه کړې، په همدې اړه د فلسطینیانو سره د خواخوږۍ د نړیوالې ورځې په مناسبت یوه پیغام کې چې د المغرب رسمي خبري آژانس نشر کړ ی ؤ، ویلي دي چې: ( د غزې په تراډې باندې د محاصرې دوام به د مایوسۍ او بې ثباتۍ په دوام کې لا مرسته وکړي) او زیاته يې کړه چې د غزې په تراډه کې د میشتو کابو دوه ملیونه اوسېدونکو فلسطينيانو ژوند له اجتماعي سزا سره مخ دی چی له کابو دولسو کلونو راهیسې پر هغوی تپل شوېده، کوم چې د هغوی اقتصادي، صحي او خدماتي برخې یې سختې زیانمنې کړي دي.
د المغرب پادشاه غوښتنه کړې ده چې د فلسطین قضیه دې د نړیوالو لومړیتوبونو سرته راوړل شي او د دوو مستقلو هیوادونو پر بنسټ ولاړه یوازینۍ هغه سیاسي حل لار ده چې کولای شي د فلسطین او اسرائيلو ترمنځ شخړې له منځه یوسي او په منځني ختیځ کې د تلپاتې سولې او ثبات ضامن شي. همدارنګه یې زیاته کړه چې ټول دا خبره درک کوي چې د فلسطینیانو او اسرائيلو ترمنځ شخړه په ټوله معنا سیاسي ستونزه ده چې که څه هم د نورو ګټورو لارو ترڅنګ مونږ په دې باور یو چې هیڅ ممکنه نده چې دا ستونزه دې د نړیوالو قراردادونو او د عربي اتحاديې د سوله ایزو هڅو بر بنسټ په شامله او عادله توګه حل کړای شي، ترڅو ددې ستونزی لپاره سیاسي حل رامنځ ته نشي، نو ویلی شو چې دفلسطین قضیه له سیاسي حل پرته بل بدیل نلري.
