(کابل ټکی کام، ۱۳۹۸ ليندۍ ۱۱، دوشنبه)
د تونس د کورنيو چارو وزارت وايي، د دغه هيواد په شمال غرب بیجا ولایت کې په یوه ترافیکي پېښه کې څلورويشت کسان مړه شوي او له شلو زيات ټپيان دي.
د وزارت په اعلاميه کې راغلي، پېښه د بس موټر د چپه کيدو له امله رامنځته شوې چې په وينا يې ۴۳ تنه پکې سپاره وه.
سرچينه زياتوي، دغه بس موټر له پلازمیني تونس څخه عين دراهم ښار ته روان و چې پر لاره کې له سړکه وتلی او یوې کندې ته لويدلی دی.
د پېښې ځای ته د تونس ولسشمر قيس سعيد او سرپرست لومړی وزير يوسف چاهد هم ورغلي، او د پېښې قربانيانو سره يې غمرازي شريکه کړې.
