کابل ټکی کام (یکشنبه، ۲۵ ثور، ۱۴۰۱ل)
د اسلامي امارت په مشرۍ د افغان سرپرست حکومت د بهرنیو چارو وزیر مولوي امیرخان متقي کابل کې د اهل تشیع علماوو سره په ناسته کې ویلي چې دښمن هڅه کوي د افغانانو ترمنځ د تفرقې په اچولو سره خپلو شومو موخو ته ځان ورسوي.
نوموړي زیاته کړې ده چې د هېواد په ۳۴ ولایتونو کې دښمن نه دی توانېدلی، چې لږ تر لږه یوه کوچنۍ پوسته هم تر لاسه کړي، له همدې امله غواړي چې جوماتونو او تکیه خانو کې په چاودونو سره د افغانستان د قومونو او مذهبونو ترمنځ تفرقه رامنځته کړي.
متقي ټینګار کړی دی چې دښمن به په دې توګه هیڅکله خپلو موخو ته ونه رسېږي.
متقي یو ځل بیا ټینګار کړی دی چې اسلامي امارت له ټولې نړۍ سره سالمې اړیکې غواړي او له نورې نړۍ هم غواړي چې د خبرو له لارې خپلې غوښتنې مطرح او له دوی سره د اړیکو نوی فصل پرانیزي.
