کابل ټکی کام (چهارشنبه، ۱۹ زمری، ۱۴۰۱ل)
د امریکا دا ادعا چې د القاعدې نړیوال جهادي غورځنګ مشر “ایمن الظواهري” یې وژلی او د دې ادعا د ثابتولو لپاره د اسنادو نشتوالي ګڼې پوښتنې او شکونه راپارولي دي.
یو شمېر سیاسي کارپوهان په دې باور دي، چې که په کابل کې د امریکا په وروستي هوايي برید کې د القاعدې د مشر ایمن الظواهري وژل کېدل رښتیا وي، نو د عملیاتو د صحنې ویډیو او د الظواهري مړی او یا یې هم عکس باید نړۍ ته وښودل شي.
دوی وايي چې په کابل کې د الظواهري د مړینې اعلان هم یو استخباراتي کړنه ده چې امریکا او د دوی سیمه ییزو ملګرو د خپلو شومو موخو د تحقق لپاره ترسره کړې ده.
د سیاسي چارو کارپوه “سرور نیازی” وايي: «که دا رښتیا وي، امریکا باید داسې شواهد وړاندې کړي چې د ایمن الظواهري پر جسد څه شوي او د برید له ځای څخه اخیستل شوې ویډیو دې نندارې ته وړاندې کړي.
خو ځينې بيا وايي چې ښايي دا د افغانستان په خاوره کې د امريکا د متحدو ايالتونو د بې پيلوټه الوتکو وروستی بريد نه وي او د دې د دوام لپاره ښايي دوی نه غواړي داسې شواهد وړاندې کړي ځکه چې دوی نه غواړي د معلوماتو سرچينې یې افشا شي.
د سیاسي چارو کارپوه طارق فرهادي وايي: «د امریکا له لوري د الظواهري د وژل کېدو په اړه شواهد نه دي وړاندې شوي، دوی نه غواړي چې خپلې معلوماتي سرچینې او عملیاتي کړنلارې افشا کړي، ځکه ښايي دا ډول عملیات دوام ولري.
د نوموړي په خبره امریکا د شواهدو په څرګندولو کې ځان مکلف نه ګڼي، خپل دښمن پیژني او هر کله چې وغواړي برید پرې کولای او وژلی یې شي.
د ویلو ده چې د امریکا ولسمشر جوبایډن تیره اوونۍ اعلان وکړ، چې د القاعدې مشر ډاکټر ایمن الظواهري یې د بې پیلوټه الوتکې په برید کې وژلی دی طالبانو که څه هم د امریکا وروستی برید منلی او د دوحې له تړون څخه یې څرګنده سرغړونه بللې ده خو تر اوسه نه طالبانو او نه هم القاعدې د ایمن الظواهري د برخلیک په تړاو څه ویلي دي.
