لیکنه : ذوالکفل ذکي
سیدابراهیم حسین مشهور په سید قطب ۱۹۰۶م کال دمصر په الصعید منطقه په یوه غریبه کورنۍ کې دنیا ته سترګې وغړولې.
په لس کلنۍ کې مکمل قرآن کریم حفظ کړ،۱۹۲۰م کال قاهرې ته د زده کړو لپاره لاړ،۱۹۳۳م کې د ادبیاتو له پوهنځي فارغ او دمصر دولت لخوا د معارف په وزارت کې په دنده وګومارل شو.
سید قطب پدې وخت کې یو عام سړی وه،آزادې لیکنې به یې کولې،د خوږې ژبې او پریکنده قلم څښتن وه،شرعي علوم یې لوستي وه،او یو حکومتي کارمند وه.
دا چې نوموړي د معارف په وزارت کې دنده درلوده نو د مصر حکومت امریکا ته ولیږه تر څو د غرب نصاب،درسي میتود او علمي تجربې مصر ته انتقال کړي.
سید قطب رح وایي:
زه امریکا ته لاړم او د غربي نصاب او میتود اړوند مې مطالعه او تحقیق پیل کړ چې یوه ورځ کلک مریض شوم،شفاخانې ته لاړم،ډاکترانو بستر کړم،چې لږ مې وضعه ښه شوه او بیدار شوم، شفاخانه کې شور ماشور مې تر غوږو شو،ورپاڅیدم چې ګورم ډاکتران یو بل ته غاړې او مبارکیانې ورکوي،په کړس کړس خاندي،مختلفې غذا ګانې راغوښتي او میله یې جوړه کړې.
یوه ډاکتر ته ورپه غوږ شوم چې ورته مې وویل ما خو ستاسې ټول فرهنګ او ژوند مطالعه کړی دا خو مو نه اختر او نه د کومې بلې خوشحالی ورځ ده،نو ولې دومره خوشحالي او میلې کوی؟
ډاکتر په تعجب راته وکتل چې ته نه یې خبر؟
مال نه!
وای نن ورځ په مصر کې د نصرانیت تر ټولو ستر دښمن ووژل شو.
مال دا څوک ده؟ وای امام حسن البناء
دې خبرې ماته یو ټکان راکړ او تر دې وخته ما امام حسن البناء شهیـد تنها په نامه پیژانده.
دا چې زه یو پیژندل شوی لیکوال وم،له دې واقعې څو ورځې وروسته د برطانیې سفیر خپل کورته میلمه کړم، زه چې له مصره راتلم مایو کتاب د “العدالة الاجتماعیة فی الاسلام” په نوم لیکلی وه،مطبعې ته مې سپارلی وه خو چاپ شوی نه وه چې امریکا ته راغلم،د سفیر کورته لاړم، پر میز یې یو کتاب پروت دی چې ورنژدې شوم ګورم چې همدا زما کتاب دی چې تر اوسه ماته هم نه وه رارسیدلی خو دده پر میز پروت وه.
دغو دوه پیښو ماته یو ټکان راکړ،ضمیر مې په څپو شو،په دې پوه شوم چې صلیبی نړۍ څومره د اسلام خلاف حساسه ده،له ځان سره مې کلک هوډ وکړ،بیرته مصر ته راغلم امام حسن البناء رح شهید شوی وه،د اخوان المسلمیـن پر اړوند مې مطالعه پیل او ددې حرکت غړۍ شوم.
شهیـد سید قطب رحمه الله بیا تاریخ بدل کړ،داسې تألیفات یې وکړل چې دټول غرب تهدابونه یې په لړزه کړل،داسې چې صلیبي مؤرخین سید قطب شهیـد رحمه الله له ابن تیمیه رحمه الله څخه وروسته د نصرانیت دوهم تر ټولو ستر دښمن ګڼي.
لسکونه کتابونه یې تألیف کړل،د في ظلال القرأن په نوم یو تفسیر یې په زندان کې ولیکه چې له شهـادت یو کال وروسته اته ځلې چاپ شو،او په اسلامي نړۍ کې خاص محبوبیت لري.
د معالم في الطریق په نوم یو کتاب یې ولیکه چې له امله یې د دار تر کړۍ ورساوه.
دمصر حکومت د اسلام دغه ستر مدافع له دوه خویندو او اوښي سره 7 کاله زنداني کړل،داسې ظلمونه یې پرې وکړل چې قلم یې د لیکلو تاب نلري.
خلکو یې د ازادۍ غوښتنه وکړه حکومت یې هغه خور چې 7 کاله یې نه وه لیدلې ورته د ازادی خط سره راولیږله چې دومره پکې ولیکه چې څه مې کړي په هغه پښیمان یم.
شهیـد سید قطب ورته وویل: الاصبع الذي یشهد مراة بالوحدانیت الله یرفض لیکتب کلمة واحدة یقر به حکم الطاغیه.
د الله پر ذات یې قسم وکړ او ویې ویل:
هغه ګوته چې په هرلمانځه کې الله ته پورته کیږي،دوی خو یوه جمله غواړي یو حرف به هم ورته ونه لیکم.
که مې پر حق محاکمه کوي زه حق ته تسلیم یم او که مې پر ناحقه محاکمه کوي زه ددې نه ډیر لوړ یم چې له باطل ترحم وغواړم.
د اعدام فیصله پرې وشوه،او کله چې پر میز ودرول شو او د اعدام رسۍ یې په غاړه کې ورواچوله یو درباري ملا ورته راغی او ورته یې وویل:
“یا سید قل لااله الاالله ” اې سیده کلیمه دې ووایه.
شهیـد سید قطب رحمه الله چې د اعدام رسۍ یې په غاړه کې وه له پاسه ورته راوکتل ورته مسکی شو وای:
ته بیچاره ګۍ هم راغلې چې دا ډرامه پوره کړې.
انا اموت لاجل لااله الا الله و انت تأکل الخبز بـ.لااله الا الله
زه د لااله الله له وجې اعدامیږم او ته په لااله الا الله ځانته ډوډۍ پیدا کوې.
ظالم میز ته لغته ورکړه او د امت دا ستره هستې،د اسلام شهیـد،باتور شازلمی،او نه ماتیدونکې د بتاري ژبې او قلم څښتن د خپل رب پر لور رهي شو.
تر ننه په نړۍ کې د اسلام د دغه ستر شخصیت پر کتابونو کلک بندیز ده،که چاسره پیدا شي میاشتې میاشتې زندان پرې تېروې.
تقبله الله
