کابل ټکی کام (دوشنبه، ۱۹ لیندۍ، ۱۴۰۳ل)
د صهیونیستي اشغالګر ريژیم معتبرې ورځپاڼې “اسرائیل ټایمز” د پوځي چارواکو په حواله ویلي، چې د نتنیاهو له پرېکړې وروسته یې ځواکونه له خنډ او ځنډ پرته د سوریې خاوره کې مخ پر وړاندې روان دي.
یادې ورځپاڼې د صهیونیستي ريژیم د دفاع وزارت په حواله ویلي، چې تر اوسه یې پوځیان د سوریې په خاوره کې د “HTS” ځواکونو چې دا مهال په پلازمېنه دمشق واکمنه ده له مقاومت سره نه دي مخ شوي.
د یادې ورځپاڼې په خبره تر اوسه هر څه په ارامه توګه پرمخ روان دي؛ خو په خبره یې عملیات یې محدود دي او په راتلونکو څو اونیو کې به پای ته ورسېږي.
د یادونې وړ ده، چې تر دې دمه تحریرالشام ځواکونو د صهیونیستي ريژیم د ادعاوو په هکله څه نه دي ویلي؛ خو د دمشق تر نیول کېدو درې ورځې وړاندې د تحریرالشام د واکمنې ډلې مشر “ابو محمد الجولاني” د امریکا CNN تلویزیوني شبکې سره په یوې ځانګړې مرکه کې ویلي و، چې له نړېوالې ټولنې او ګاونډیو هېوادونو سره د مثبتو اړېکو غوښتونکي دي او له سوریې د باندې د عملیاتو پلان نلري.
