کابل ټکی کام (جمعه، ۱۵وری، ۱۴۰۴ل)
په ننګرهار کې د اطلاعاتو او کلتور ریاست په کوربتوب د زرګونو هېوادوالو، شاعرانو او د ادب مينه والو په ګډون د نارنج ګل کلنۍ دودیزه مېله او مشاعره ترسره شوه.
د ننګرهار د اطلاعاتو او کلتور رياست مسوولين وايي، چې نارنج ګل مشاعره کې له پلازمېنې او ولایتونو څخه لیکوالانو، شاعرانو، فرهنګي شخصیتونو، د بېلابېلو ملکي او نظامي ادارو رییسانو، مسوولینو او له کوزې پښتونخوا څخه راغلو نوموتو شاعرانو او د ادب مينه والو برخه اخیستې وه چې شمېر يې زرګونو کسانو ته رسېده.
د نارنج ګل مشاعرې یوې شمېر ګډونوال وايي، نارنج ګل مشاعره د هېواد د کلتور ژوندي ساتلو تر څنګ د هېوادوالو د یووالي یو مهم سمبول دی او دا چې د اطلاعاتو او کلتور رياست د لس زره تنو ګډونوالو لپاره منظم ترتيبات نيولي و نو ګډونوال هم د مشاعرې له ترتيبوونکو او مسوولينو خوښ و.
د نارنج ګل مشاعره، چې د ۱۳۴۴ هـ لمریز کال راهیسې د ادبپالو په نوښت پیل شوې، د هر پسرلي په راتګ د پښتو ژبې، خیال، او فرهنګي هویت د ویاړ نښه ګرځېدلې چې سږکال هم دا مشاعره له تمثیلي پارچو، د پسرلي د رنګونو انځورونو، او د شاعرانو له زړهراښکونکو زمزمو سره لا زیاته زړهراښکونکې وه.
