کابل ټکی کام (پنجشنبه، ۲۱ کب، ۱۴۰۴ل)
د مالیې وزارت د ګمرکونو لوی ریاست وایي چې د ګمرکي چارو د چټکتیا او سوداګرو ته د اسانتیاوو د برابرولو لپاره یې د څه باندې ۱ میلیون او ۴۵۲ زره امریکایي ډالرو په ارزښت ۸ کرینونه پېرلي دي.
د وزارت په وینا، دغه کرینونه نوي ماډل دي چې په ۲۰۲۵ کال کې تولید شوي او هر یو یې د ۲۵ ټنه وزن د پورته کولو وړتیا لري.
د معلوماتو له مخې، دغه کرینونه به د بلخ، ننګرهار، کندهار، نیمروز، هرات او فراه ګمرکونو ته وسپارل شي.
دا پروژه د افغانستان اسلامي امارت او ازبیکستان ترمنځ د G2G تړون له لارې عملي شوې او لګښت یې د مالیې وزارت له پراختیايي بودیجې ورکړل شوی دی.
چارواکي وایي، هڅه کوي د هېواد ګمرکونه په عصري تجهیزاتو سمبال کړي څو سوداګرۍ ته لا وده ورکړل شي.
