کابل ښاروالي: کابل ښار کې شاوخوا ۴۵۰ کیلومتره نوي سړکونه جوړ، سفالټ او کانکریټ شوي
کابل ټکی کام (شنبه، ۲۲ وری، ۱۴۰۵ل)
کابل ښاروالۍ د خپلو کلنیو لاسته راوړنو د وړاندې کولو په غونډه کې ویلي، چې په تېرو څلورو نیمو کلونو کې د کابل ښار په بېلابېلو برخو کې شاوخوا ۴۵۰ کیلومتره نوي سړکونه جوړ، سفالټ او کانکریټ شوي دي.
د ښاروالۍ د ښاري خدمتونو او چاپېریال ساتنې مرستیال محمد خالد سجستاني ویلي، له دې شمېر څخه ۱۳۷ کیلومتره سړکونه یوازې په تېر کال کې رغول شوي دي.
د ښاروالۍ په وینا، د یادې مودې په ترڅ کې ۴۷۲ زره ۹۵۷ متره سړکونه ترمیم شوي، همدارنګه ۱۸ زره ۵۸۵ متره کانالونه جوړ شوي او ۶ زره ۱۴۷ متره نور تر کار لاندې دي.
دغه راز کابل ښاروالۍ ویلي چې په همدې موده کې ۶ میلیونه ۳۹۹ زره نیالګي او بوټي تولید، تکثیر او کېنول شوي، ۱۲ پارکونه جوړ او بیارغول شوي او درې نور پارکونه لا تر کار لاندې دي.
