د لاس پلورونکو د تنظیم لپاره د اسلامي امارت د زعيم نوی فرمان صادر شو

کابل ټکی کام (شنبه، ۲۲ وری، ۱۴۰۵ل)

د ا.ا.ا مشرتابه د لاس پلورونکو د چارو د تنظیم او د ښاري بې نظمۍ د مخنیوي په موخه نوی فرمان صادر کړی چې له مخې يې، ښارونو کې د ګڼه ګوڼې کمول او د ښاري نظم ټینګښت د دې پرېکړې اساسي هدف بلل شوی دی.

د فرمان په لومړۍ ماده کې راغلي، چې ټولې ښاروالۍ مکلفې دي د ښاري طرحو او ټاکل شویو معیارونو په پام کې نیولو سره د لاس پلورونکو فعالیتونه تنظیم کړي او دا چارې باید د منظمو اصولو له مخې ترسره شي څو د ښارونو عمومي نظم خوندي پاتې شي.

همدارنګه، په فرمان کې ټینګار شوی چې که لاس پلورونکي له ټاکل شویو اصولو سرغړونه وکړي، ښاروالۍ کولای شي د قانون له مخې پر هغوی لازم اقدامات او تأدیبي کړنې عملي کړي او په فرمان کې ویل شوي د ښاري بې نظمۍ او ګڼه ګوڼې د مخنيوي او د لاس پلورونکو د چارو د تنظیم په موخه لاندې مراتب منظوروم:

(۱) ښاروالیانې په ښارونو کې د لاس پلورونکو د چارو د تنظیم په برخه کې لاندې وظيفې لري:

۱- د لاس پلورونکو لپاره د ښارونو په مختلفو ساحو کې له اړوندو ادارو سره په همږغۍ د فعالیت د زمينې برابرول؛

۲- د لاس پلورونکو لپاره د ځانګړو ځايونو مشخص کول او د اړتیا په صورت کې يې ځای بدلول، البته چې پلور يې متضرر نه شي؛

۳- د لاس پلورونکو د فعالیت لپاره په مشخص شويو ساحو کې خط اندازي او د هر لاس پلورونکي لپاره د مشخصې اندازې ځای ټاکل؛

۴- د لاس پلورونکو لپاره د غرفو، تختونو او کاري مېزونو د طرحې (نقشې) برابرول؛

۵- د اړوندو ادارو په همږغۍ په ناحیو کې د لاس پلورونکو فعالیت ته په کتو د هغوی ثبت او ثبت شویو لاس پلورونکو ته په وړیا توګه د پېژندګلوۍ کارتونو جوړول او وېشل؛

۶- د لاس پلورونکو د ثبتولو لپاره د معلوماتي زېرمې (ډیتابېس) رامنځته کول او د هغوی مکمل شهرت، د فعالیت ډول او د فعالیت ساحې (د GPS نقطې) ثبتول؛

۷- د لاس پلورونکو له لوري د تاریخ تېرو او ممنوعه توکو د خرڅلاو او په ممنوعه سيمو کې د فعالیت او د لاس پلورونکي د پېژندګلوۍ کارت د نه لرلو د مخنیوي په منظور، له اړوندو ساحو څخه دوامداره نظارت کول.

(۲) ښاروالیانې مکلفې دي، د لاس پلورونکو د لا ښه ترتیب او تنظیم په منظور داسې فرصت برابرکړي چې هر سل لاس پلورونکي یو تن د خپل استازي په توګه وټاکي او ښاروالۍ ته يې معرفي کړي، البته ټاکل شوی شخص يوازې د هغوی استازی دی نه قراردادي.

(۳) ښاروالیانې نه شي کولای، د دې مادې د (۱) فقرې په ۴ جزء کې د ذکر شوې طرحې (نقشې) په مقابل کې له لاس پلورونکو څخه پیسې واخلي، بلکې یاده طرحه (نقشه) دې د دې فرمان له حکمونو سره سم کارت لرونکي لاس پلورونکي ته په اختیار کې ورکړي او په خپله دې د غرفو، تختونو او کاري مېزونو له جوړولو او خرڅولو څخه ډډه وکړي.

درېیمه ماده:

(۱) د ښارونو لاس پلورونکي لاندې مکلفیتونه لري:

۱- ښاروالیو ته د اړوندې برېښنايي پېژندپاڼې نقل او د موبایل د فعالې شمېرې سپارل او د لاس پلورونکو د پېژندګلوۍ کارت ترلاسه کول؛

۲- د ښاروالیو له تأیید شوې طرحې او مشخصاتو سره سم د خپلې غرفې، تخت یا کاري مېز جوړول او د اړوندې ساحې د نظافت مراعتول؛

۳- په مشخص شوي ځای کې د فعالیت ترسره کول او د مشخص شوي ځای د پرېښودلو په صورت کې اړوندې ښاروالۍ ته په لیکلي ډول خبر ورکول؛

۴- د مشتريانو د جلبولو لپاره د لاوډسپېکرونو له کارولو څخه ډډه کول؛

۵- د زاړه (تاریخ تېر شوي) او ممنوعه توکو له خرڅولو څخه ډډه کول؛

۶- بل شخص ته د خپل مشخص شوي تخت او کاري مېز له کرایې، اجارې او یا پلورنې څخه ډډه کول؛ مګر دا چې مخکې له مخکې یې اړونده ښاروالي په جریان کې کړې وي؛

۷- بل شخص ته د خپل مشخص شوي ځای له کرایې، اجارې او یا پلورنې څخه ډډه کول.

(۲) که لاس پلورونکي د دې مادې د (۱) فقرې له ۱ جزء څخه تر ۶ جزء پورې له درج شويو حکمونو څخه سرغړونه وکړي، ښاروالیانې هغه په لاندې ډول تأديبوي:

۱- په لومړي ځل د لیکلې اخطاريې ورکول؛

۲- په دوهم ځل لاس پلورونکی له اړوندې ساحې څخه اېستل او د دې فرمان له حکمونو سره سم يې بل مستحق شخص ته ورسپارل.

(۳) که لاس پلورونکی د دې مادې د (۱) فقرې په ۷ جزء کې له درج شوي حکم څخه سرغړونه وکړي، ښارواليانې دې یاد شخص اړوندې محکمې ته وروپېژني.