کابل ټکی کام (سه شنبه، ۸ غویی، ۱۴۰۵ل)
نیویارک ټایمز راپور ورکړی چې د امریکا ولسمشر ډونالډ ټرمپ خپلو سلاکارانو ته ویلي، د ایران له وروستي هغه وړاندیز څخه راضي نه دی چې د هرمز تنګي د بېرته پرانیستلو او جګړې د پای ته رسولو لپاره وړاندې شوی و. راپور وایي، دغه موضوع د سپینې ماڼۍ د عملیاتو خونې په ناسته کې څېړل شوې ده.
د راپور له مخې، د ایران په وړاندیز کې د امریکا د سمندري محاصرې پای ته رسول هم شامل وو، خو د تهران اټومي پروګرام په اړه پرېکړه به وروسته ته ځنډول کېده. امریکایي سرچینو ویلي، واشنګټن ټینګار کوي چې ایران باید اټومي وسلو ته د رسېدو وړتیا ونه لري.
راپور زیاتوي، د امریکا د ادارې دننه پر دې بحث روان دی چې پر ایران د اقتصادي فشارونو دوام وشي او که نور پوځي اقدامات هم ترسره شي. بل لور ته ایراني چارواکو ویلي، د هرمز تنګي د پرانیستلو هر ډول هوکړه باید د دوی د سمندري مالیاتو او لګښتونو حق هم په پام کې ونیسي.
